Senator Kókshetaýda JEO qurylysyn jedeldetýge shaqyrdy
NUR-SULTAN. QazAqparat - Senator Nurlan Bekenov elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda Kókshetaý qalasyn energııamen jáne jylýmen qamtamasyz etý máselelerin kóterdi, dep habarlaıdy QazAqparat tilshisi.
Depýtattyń aıtýynsha, Kókshetaý – elimizdegi jylý jáne elektr energııasynyń qazirgi zamanǵy kózi joq jalǵyz oblys ortalyǵy. Bul rette jylýmen jabdyqtaý 1978 jyly paıdalanýǵa berilgen, qýaty qalaǵa jetispeıtin eskirgen qazandyqtarmen júzege asyrylady.
Senatordyń pikirinshe, qaladaǵy elektr qýatynyń tarıfi elimizdegi eń joǵary tarıfterdiń biri bolyp otyr. Elektr energııasy basqa oblystardyń energııa óndirýshi stantsııalarynan ondaǵan deldaldardyń jelileri arqyly qalaǵa keledi.
Qazirgi zamanǵy JEO salý máseleni sheshýge kómektesedi, alaıda onyń qurylysyn Mınıstrler Kabıneti tek 2026 jylǵa ǵana josparlap otyr. Senator jobany sozbaýǵa jáne barlyq bıýrokratııalyq máselelerdi barynsha jedel sheshýge úndedi.
«Premer-Mınıstr bekitken jol kartasyna sáıkes, JEO-nyń birinshi keshenin paıdalanýǵa berý, ókinishke qaraı, tek 2026 jyldyń qazan aıyna josparlanǵan. JEO qurylysy respýblıkalyq joba retinde tanylǵanyna qaramastan, onyń qurylysy uzaqqa sozylyp bara jatyr. Tek memlekettik-jekeshelik áriptestik týraly shartqa qol qoıý merziminiń ózi 2023 jylǵa josparlanǵan. Kókshetaý qalasynda elektr jáne jylý energııasynyń tapshylyǵy bar ekenin, sondaı-aq olardy tutyný ósip kele jatqanyn eskere otyryp, JEO salý merzimin qysqartý kerek», - dedi Nurlan Bekenov.
