Senator Kókshetaý mańyndaǵy «Nurly kósh» turǵyndarynyń problemasyn aıtty
Depýtattyń saýal joldaýyna Kókshetaý qalasy Krasnyı ıAr aýyldyq okrýgindegi «Nurly kósh» baǵdarlamasy boıynsha qys aılarynda múldem turýǵa jaramsyz, sapasyz salynǵan úılerdiń turǵyndarynyń shaǵymdary men osy máselege qatysty Dúnıejúzilik qazaqtardyń qaýymdastyǵynan komıtettiń atyna kelip túsken haty negiz bolǵan.
Senatordyń aıtýynsha, Krasnyı ıAr aýyldyq okrýgine qarasty «Nurly kósh» turǵyndarynyń muń-muqtajyn estý úshin bir top senator onda bıylǵy 14 qarashada arnaıy saparmen baryp qaıtqan.
«Úkimet 2009 jyly «Nurly kósh» baǵdarlamasyn iske asyrý maqsatynda turǵyn úıler salý úshin respýblıkalyq bıýdjetten 1 mlrd 200 mln teńge, ıaǵnı árbir eki páterli úıge sol kezdegi dollar baǵamymen 59 myń dollar bóldi. Osy qarajatqa 2010 jyly Krasnyı ıAr aýyldyq okrýginde 276 otbasy úshin 138 eki páterli turǵyn úı salynyp, shetelderden kóship kelgen qandastarymyzǵa paıdalanýǵa berilgen. Keshendegi úılerdiń qabyrǵalary joǵaryda aıtylǵan qomaqty qarjy bóline tura soltústiktiń 40 gradýs qysyna múldem shydas bermeıtin gıpsokarton, penopleks, panelden, peskobloktan salynǵan», - dedi depýtat Senattyń jalpy otyrysynda.
Onyń sózine qaraǵanda, úılerdiń qabyrǵalary óte juqa, arasy qýys. Turǵyndar qysta tońyp, úıleri sýyq bolǵandyqtan týystarynyń úıinde turýǵa májbúr, kóbisi ártúrli aýrýmen aýyrady. Úılerdi qalpyna keltirý úshin turǵyndar óz qarajatynan jylda jóndeý jumystaryn jasaıdy eken. Sońǵy ýaqytta keıbir úılerdiń tóbesi qulap, jóndeý jumystaryn jasaýǵa múmkindikteriniń joqtyǵy anyqtaldy. Úılerdiń kóbisi derlik apattyq jaǵdaıda.
«Bastapqyda 276 otbasy «Saryarqa» áleýmettik-kásipkerlik korporatsııasymen ár aıǵa 7 myń teńge jalǵa alý qarajatyn tóleıtin bolyp kelisimshartqa otyrǵan. «Saryarqa» áleýmettik-kásipkerlik korporatsııasy bankrot bolyp, odan keıin «Kókshetaý qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólim» mekemesiniń balansyna bekitilip, mekeme turǵyndarmen jalǵa alý kelisimshartyna otyrǵany belgili boldy. Keshendegi turǵyn úıdiń ortasha quny 3 mıllıon 200 myń teńge bolyp eseptelgen. Jergilikti ákimshilik pen turǵyndarynyń arasynda turǵyn úıdi satyp alý sharty retinde, bankten nesıe alyp, aı saıyn 25 myń teńge kóleminde nesıe tólep jáne 7 myń teńge jalǵa alý qarajatyn tólep turý kelisimi de jasalǵan. Biraq, turǵyndardyń kópshiligi úıleriniń apattyq jaǵdaıda bolýyna baılanysty jáne áleýmettik jaǵynan álsiz toptar qataryna jatqandyqtan, tólemnen bas tartqan. «Qazaqstannyń turǵyn úı qurylys jınaq banki» AQ málimetine sáıkes, osy kezde turǵyndardyń bereshegi 32 mln teńgeni quraǵan», - dedi M. Baqtııaruly.
Sonymen qatar depýtat osy ýaqytqa deıin olardyń turǵyn úılerin jer ýchaskelerimen birge turǵyndardyń menshigine berýdiń joldary qarastyrylmaǵanyn aıtty.
«Sondyqtan keshendegi turǵyn úılerdiń búgingi kúngi naqty baǵasyn anyqtaý maqsatynda Jyljymaıtyn múlikti baǵalaıtyn arnaıy komıssııa quryp, apattyq jaǵdaıdaǵy turǵyn úılerge jóndeý jumystaryn jasaýǵa múmkin emes úılerdiń turǵyndaryna jer ýchaskelerimen birge jekemenshikterine berý joldaryn qarastyrý kerek. Sonda ǵana bul másele tolyqqandy sheshimin tappaq», - dedi senator.
