Senator Kishi Araldaǵy sý deńgeıin kóterýge qatysty usynys aıtty

NUR-SULTAN. QazAqparat – Senattyń jalpy otyrysynda depýtat Murat Baqtııaruly Aral teńiziniń soltústigindegi Kishi Aral basseıninde sý deńgeıiniń tómendeýine alańdaýshylyq bildirdi, dep habarlaıdy QazAqparat tlshisi.

Senatordyń aıtýynsha, Kishi Araldaǵy sý kólemi qazir 22 mlrd tekshe metrdi quraıdy. Ol aldyńǵy jyldarǵa qaraǵanda 5 mlrd tekshe metrge azaıǵan. Kishi Aralǵa quıatyn Syrdarııa ózeniniń sýyn paıdalanýdyń qazirgi qarqyny saqtalar bolsa, aldaǵy 5-7 jylda teńizdiń soltústigi qurǵaqqa aınalyp, ekologııalyq apatqa ushyraýy múmkin.

Osyǵan oraı Murat Baqtııaruly teńizdi saqtap qalý úshin keshendi sharalar qabyldaý qajettigin aıtty. Sonyń aıasynda sý dıplomatııasyn belsendi júrgizý, sýdy tıimdi paıdalaný jáne tıisti zańdarǵa ózgertýler engizýdiń bereri mol ekenin tilge tıek etti.

«Osydan 17 jyl buryn qabyldanǵan elimizdegi sý resýrstaryn basqarý zańy qazirgi talaptarǵa jaýap bere almaıdy. Sondyqtan sýdy paıdalanýdyń jańa tujyrymdamasy jasalyp, ol tek sýǵa qajettilikti rettep qoımaı, sý nysandarymen baılanysty tabıǵı ekojúıelerdi saqtap, sýdy únemdeýge yntalandyrý úshin tutyný salasyndaǵy tarıfterdi qaıta qarap, ozyq tehnologııalardy engizýge muryndyq bolýǵa tıis», – dedi Murat Baqtııaruly depýtattyq saýalynda.