Senator Qazaqstanda júrgizýshi kýáligin alý tártibin ózgertýdi usyndy

ASTANA. KAZINFORM – Byltyr jol-kólik oqıǵalary aldyńǵy jylmen salystyrǵanda eki esege jýyq kóbeıip ketken. Sonymen qatar, jaraqat alǵan balalar sany 4 myńnan 10 myńǵa deıin ósti. Bul derekterdi senator Marat Qojaev óz depýtattyq saýalynda jarııa etti.

- Quqyq qorǵaý organdarynyń málimetinshe, 2024 jyldyń 12 aıynda elimizde 31 597 jol-kólik oqıǵasy tirkelgen, ósim 99 paıyzǵa jýyq boldy. Erekshe alańdatatyn jaıt, zardap shekken balalar sany artqan, ıaǵnı jaralanǵandar 133,7 paıyzǵa jáne mert bolǵandar sany 3,5 paıyzǵa ósti, - dedi M. Qojaev Úkimet basshysynyń atyna joldaǵan saýalynda.

Depýtattyń aıtýynsha, jol apattarynyń jıileýiniń negizgi sebepteriniń biri – júrgizýshilerdi daıyndaý deńgeıiniń tómendigi. Jol-kólik oqıǵalarynyń 96 paıyzy jol qozǵalysy erejelerin buzýdan týyndaıdy. Kóptegen júrgizýshiler mektebiniń túlekteri sapaly bilim almaıdy, al keıbir júrgizýshi kýáligin zańsyz jolmen ıemdenedi. Taksı qyzmetinde eleýli kemshilikter baıqalyp otyr. Taksı júrgizýshileri demalyssyz jumys isteıdi jáne mindetti medıtsınalyq tekserýden ótpeıdi, bul aýyr zardaptarǵa ákeledi.

Onyń paıymynsha, júrgizýshilerdi daıarlaý jáne attestattaý júıesin jetildirý sharalaryn qabyldaý qajet. Bul úshin júrgizýshilerdi oqytatyn uıymdarǵa memlekettik baqylaý engizý, emtıhan tapsyrý jáne júrgizýshi kýáligin alý tártibin qaıta qaraý kerek.

- Sonymen qatar, aınalma joldardyń qurylysyn jedeldetý, eldi mekenderde jaryqtandyrý men jaıaý júrginshiler ótkelderin qamtamasyz etý, jol-kólik oqıǵalaryn esepke alýdyń biryńǵaı tsıfrlyq júıesin ázirleý jáne zamanaýı jol standarttaryn engizý mańyzdy. Joldaǵy qaýipsizdik pen ózin-ózi ustaý mádenıetine nazar aýdara otyryp, avtomektepterdiń oqý baǵdarlamasyn jańartý qajet. Emtıhan tapsyrý jáne júrgizýshi kýáligin alý tártibin qaıta qarastyrý kerek, – dep atap ótti senator.

Eske salsaq, bıyl aqpan aıynda Marat Qojaev jol erejesin jıi buzatyndarǵa aıyppul tóleýde 50% jeńildikti alyp tastaýdy usyndy.