Senator Qazaqstanda ýtılalym somasyn azaıtýdy usyndy
ASTANA. KAZINFORM — Qazaqstan azamattary úshin ımportpen keletin avtomobıldiń baǵasy tym joǵary. Oǵan kedendik alymdar, kádege jaratý tólemderi (ýtılalym) jáne alǵashqy tirkeý tólemderi sebep bolǵan. Bul turǵyda Senattyń jalpy otyrysynda depýtat Bekbol Orynbasarov elimizdiń avtoparkin jańartýdaǵy problemalardy jarııa etti.
Senatordyń aıtýynsha, depýtattarǵa kedendik alymdar, kádege jaratý tólemderiniń mólsheri men ımportpen keletin avtomobılderdi tirkeý týraly azamattardyń ótinishteri únemi kelip turady. Senatorlar Úkimetke birneshe ret depýtattyq saýal jibergen bolatyn, alaıda naqty ekonomıkalyq mindetterge, ǵylymı tujyrymdarǵa súıengen jáne eki tarapty da qanaǵattandyratyn sheshim áli tabylǵan joq. Nátıjesinde qarapaıym qazaqstandyqtarǵa avtomobıl satyp alý qıyndap barady.
Depýtat avtokólik alýǵa jeńildetilgen nesıe berý baǵdarlamasy halyqty jańa avtomobıldermen qamtamasyz etý maqsatyn oryndaı almaǵanyn, al jańa jáne sapaly avtomobılderge qol jetkizýdiń qıyndyǵy mashınany esepke qoıýdaǵy zańsyzdyqtyń kóbeıýine sebep bolǵanyn atap ótti.
Senator azamattardan túsken shaǵymdardy taldaý negizinde Úkimet basshysyna ýtılalym qunyn tómendetýdi, kedendik bajdy jáne avtomobıldi tirkegeni úshin alym mólsherin azaıtýdy usyndy.
«Qozǵaltqysh kólemi eki myń tekshe santımetrge deıingi, shyqqanyna 3 jyldan aspaǵan avtomobılder úshin ýtılalym mólsherin 150 000 teńgeden aspaıtyndaı etip qaıta qaraýdy suraımyn. Kedendik bajdy esepteý kezinde onyń kórsetkishin azaıtý jaǵyna qaraı qaıta qaraý kerek. Qazirgi kezde avtokólikterdiń birazyn Qytaıdan Qazaqstanǵa Qyrǵyz Respýblıkasy arqyly ákelinetin faktiler bar. Óıtkeni avtokólik ıeleri QQS pen bajdy bizdiń memleketimizge qaraǵanda birneshe ese az tóleıdi. Shyǵarylǵan jylyn qosa alǵanda, bes jylǵa deıin kólik quraldaryn memlekettik tirkegeni úshin alym mólsherlemesin 0,25 AEK kóleminde qarastyrýdy usynamyn. Atalǵan usynystar Qazaqstan azamattaryna sapaly jáne baǵasy tıimdi avtokólikterdi alýǵa múmkindik beredi dep senemiz», - dedi Bekbol Orynbasarov Úkimet basshysy Oljas Bektenovtyń atyna joldaǵan saýalynda.
Aıta keteıik, jaqynda Ónerkásip jáne qurylys mınıstri Qanat Sharlapaev elimizde ýtılalymǵa qatysty eshqandaı ózgeris bolmaıtynyn málim etti.
