Senator: Qazaq mektepteriniń sanyn kóbeıtý kerek
NUR-SULTAN. QazAqparat – Parlament Senatynda 2020-2022 jyldarǵa arnalǵan respýblıkalyq bıýdjet jobasynyń tanystyrylymynda senator Dınar Nóketaeva elimizde qazaq mektepteriniń sanyn kóbeıtý qajettigin másele etip kóterdi, dep habarlaıdy QazAqparat tilshisi.
«Almaty qalasynyń quramyna Almaty oblysynan eki úlken jańa aýdan qosyldy. Osy aýdandardyń máselesi jetip artylady. Ony da eskerý kerek. Bul eki aýdanda, qudaıǵa shúkir, halyqtyń sany artyp keledi. Osyǵan baılanysty mektepter salý máselesi bar. Ásirese qazaq tilindegi mektepterdi jyldan jylǵa kóbeıtý kerek dep esepteımiz. Óıtkeni, bir mektepti alatyn bolsaq, byltyrdyń ózinde qazaq tilinde oqıtyn 13 synyp ashylǵan. Tipti bir synyptyń ózinde 40-42 baladan otyrady. Sondyqtan, bolashaqta osy máseleni de eskerý kerek», - dedi Dınar Nóketaeva.
Sonymen birge, senator Almaty qalasynyń shetindegi aýdandardyń aýyz sý máselesin de tilge tıek etti.
«Sý júıelerin retke keltirý, kóliktik ınfraqurylym, ishki joldar, mektepter men aýrýhanalardy seısmıkalyq sıpatta kúsheıtý máselelerin der kezinde sheshken abzal. Óıtkeni, Almaty qalasy seısmıkalyq aýmaqta ekenin bilesizder. Nelikten Almatydan jyldan jylǵa qarajatty alyp qoıý jaǵdaıy ulǵaıyp keledi? Osy másele boıynsha Úkimet basshysy Asqar Mamınge de suraq joldadyq. Sondyqtan, Almaty qalasyna qarajatty bıylǵy bıýdjetten taǵy qarastyrý kerek dep oılaımyn», - dedi ol.
Aıta ketsek, búgin Qarjy mınıstriniń birinshi orynbasary Berik Sholpanqulov Parlament Senatynyń depýtattaryna 2020-2022 jyldarǵa arnalǵan respýblıkalyq bıýdjet jobasyn tanystyryp, bilim jáne ǵylym júıesin damytýǵa 2020-2022 jyldary 3,7 trln teńge bólingeli otyrǵanyn málim etken bolatyn.
