«Senator qazaq qyzdaryn shetelge jibergisi kelmeıdi» - respýblıkalyq basylymdarǵa sholý
***
«Premer-Mınıstrdiń birinshi orynbasary Serik Ahmetovtiń tóraǵalyǵymen selektorlyq keńes bolyp ótti. Onda kóktemgi dala jumystaryna ázirlik jáne et eksportynyń áleýetin damytý máseleleri qaraldy», - dep jazady «Egemen Qazaqstan» gazeti «Kóktemgi egiske ázirlik qalaı?» degen taqyryptaǵy maqalasynda. Basylymnyń atap ótýinshe, atalǵan másele boıynsha baıandama jasaǵan Aýyl sharýashylyǵy mınıstri Asyljan Mamytbekov bıylǵy jyly 21 mıllıon gektardan astam jerge tuqym sebiletinin aıtqan. Sonyń ishinde astyq egistiginiń kólemi 16,3 mıllıon gektardy quraıdy. Barlyq oblystar qajetti tuqymmen tolyq qamtylǵan. Olardyń 77 paıyzdan astamy tıisti tekseristen ótkizilgen. Kóktemgi egiske qatysýshylardy arzan janar-jaǵarmaımen qamtý máselesi de sheshimin tapty. Osynyń esebinde dıqandar qaýymy janar-jaǵarmaıdy rynoktaǵydan 12 paıyzǵa tómen baǵamen alatyn bolady. Mundaı janar-jaǵarmaıdyń kólemi 360 myń tonnany qurap otyr.
«Egemen Qazaqstan» gazetiniń jazýynsha, keshe Senat Tóraǵasy Qaırat Mámıdiń jetekshilik etýimen palatanyń kezekti otyrysynda Májilis maquldaǵan 2012-2014 jyldarǵa arnalǵan respýblıkalyq bıýdjet jobasy qaraldy. Bul joly da zań jobasyn qorǵaýǵa Úkimet tolyq quramda kelip qatysty. «Respýblıkalyq túsimderdiń naqtylanǵan boljamy 5 236,9 mıllıard teńge kóleminde, ıaǵnı bekitilgen bıýdjetpen salystyrǵanda 485,9 mıllıardqa arttyrylǵan. Osy oraıda ústimizdegi jyly Ulttyq qordan kepildendirilgen transfert mólsherin 180 mıllıard teńgege ulǵaıtý kózdelgen. Respýblıkalyq bıýdjettiń shyǵys bóligi bekitilgendegimen salystyrǵanda 507,2 mıllıardqa artyp, 6 016,8 mıllıard teńgege deıin ulǵaıtylyp otyr», - dep jazady basylym. Maqala «Senat bıýdjetti qabyldady» degen taqyryppen berilgen.
***
«Qyzǵa qyryq úıden tyıý» máselesi otbasylyq deńgeıden qalyp, memlekettik máselege aınalyp bara jatqandaı. Qazaq qyzdarynyń taǵdyryna qatysty dúnıelerdiń parlamenttik minberde aıtyla bastaýy sony ańǵartsa kerek. «Alash aınasy» gazetiniń jazýynsha, keshegi Senat otyrysynda Úkimet basshysynyń atyna úshbý hat joldaǵan depýtat Jabal Erǵalıev qazaq qyzdaryn Qazaqstannan tysqary bilim oshaqtarynda oqytýdy shekteý máselesin kóterdi. «Qyzdardy shettegi oqýdan shekteý týraly máselege barmas buryn depýtat Jabal Erǵalıuly aqparat agenttikterine siltep, sońǵy ýaqytta shet memleketterde bilim alyp jatqan qazaq qyzdarynyń túrli sebeppen kisi qolynan qaza tabýyna, abyroısyzdyqqa urynýyna alańdaýshylyq tanytty», - dep jazady basylym. Tolyǵyraq «Senator qazaq qyzdaryn shetelge jibergisi kelmeıdi» degen taqyryptan oqyp, bilińizder.
Ekonomıkalyq yntymaqtastyq jáne damý uıymy Qazaqstannyń ınvestıtsııalyq saıasatyna sholý jasapty. EYDU ınvestıtsııalyq departamenti dırektory Stıven Tomsenniń aıtýynsha, Qazaqstan sońǵy 5 jylda ınvestıtsııa tartýda rekordtyq kórsetkishterge qol jetkizip, ájeptáýir jetistikterge qol jetkizgen. Bul jaıynda «Alash aınasy» gazetiniń juma kúngi sanyndaǵy «Investıtsııalyq saıasatymyzǵa sholý jasaldy» degen taqyryptaǵy maqalada keńinen baıandalǵan. «Ekonomıkalyq yntymaqtastyq jáne damý uıymy qazaqsandyq qamtý saıasatyn da synǵa alyp ótti. olar bul saıasat barlyq kompanııalar úshin ádiletti jáne ıkemdi bolýy kerek dep esepteıdi», - dep jazady basylym.
***
Bul kúnderi Kókshetaý qalasynda 23 jasqa deıingi ziltemirshiler arasynda Qazaqstan birinshilgi ótip jatyr. Oǵan respýblıkamyzdyń ár óńirinen jınalǵan 224 úmitker qatysýda. Olardyń aralarynda túrli baıraqty básekelerde jaqsy nátıje kórsetip júrgen sportshylar da bar. Osy baıraqty báseke arqaý bolǵan maqala «Aıqyn» gazetinde «Kókshetaýda kúsh synasyp jatyr» degen taqyryppen berilgen. «Búgingi tańda elimizge eń kóp medal syılap júrgen sport túri - aýyr atletıka ekeni sózsiz. Sol sebepti el-jurttyń qyzyǵýshylyǵy da erekshe. Ony biz Kókshetaýdaǵy jarys barysynda da ańǵardyq», - dep jazady basylym. Tolyǵyraq maǵlumat alǵyńyz kelse, basylymnyń búgingi nómirin jiberip almańyz.
«Qarjy polıtsııasy aǵymdaǵy jyldyń 2 aıynda sybaılas jemqorlyqqa qatysty 118 qylmystyq is qozǵady», - dep jazady «Aıqyn» gazeti. Máselen, OQO ІІD-niń áskerı-medıtsınalyq tekserý komıssııasynyń tóraıymy B.Sátkenova 17 ret para alǵan. Komıssııa tóraıymynan Almaty oblysynyń Alakól aýdandyq ishki ister bólimi Jol polıtsııasy bóliminiń bastyǵy T.Ábdirahımov ta asyp túsken. Ol para alý arqyly 28 júrgizýshige memlekettik tehnıkalyq baıqaýdan ótkendigi týraly jalǵan qujat jasap bergen. Osy qylmysy úshin bólim bastyǵy 4 jylǵa bas bostandyǵynan aıyrylǵan. Shyǵys Qazaqstan oblystyq ishki ister departamenti Jol polıtsııasy bólimshesiniń bastyǵy T.Kanapın de joǵarydaǵy áriptesiniń áreketin qaıtalaǵany úshin 7 jylǵa sottalǵan. Sonymen budan da bólek paraqorlar jaıynda bilgińiz kelse, basylymnyń juma kúngi nómirindegi «Osy jurt para alýǵa qumar» degen taqyryptaǵy maqalaǵa kóz júgirtińiz.
***
«QR Premer-Mınıstrdiń birinshi orynbasary Serik Ahmetov ortalyq atqarýshy organ basshylarynyń qatysýymen keńes ótkizip, onda Jańaózen qalasynyń máseleleri qaraldy», - dep jazady «Kazahstanskaıa pravda» gazeti. Basylymnyń jazýynsha, «QazMunaıGaz» Barlaý Óndirý» kompanııasy shamamen 2 myń adamdy jumysqa ornalastyrý máselelerin sheshý úshin 2 jańa servıstik kásiporyn qurdy. Sondaı-aq jumystan shyǵarylǵandardyń jáne olardyń otbasy músheleriniń ekinshi deńgeıli bankterden alǵan nesıelerin qaıta qurylymdaý máseleleri de sheshilýde. S.Ahmetov sonymen qatar «2012-2020 jyldarǵa arnalǵan Jańaózen qalasynyń áleýmettik-ekonomıkalyq damýynyń keshendi jospary aıasynda bekitilgen barlyq is-sharalar mezgilinde júzege asyrylatyndyǵyn basa aıtty.
