Senator «Qalamqas» ken ornyndaǵy máseleni kóterdi
Depýtat Mańǵystaý oblysyndaǵy «Qalamqas» ken ornyndaǵy 8237 uńǵyda gaz ben sýdyń birneshe márte joıqyn atqylaýynan keıin órt bolǵandyǵyn aıta kelip, Premer-Mınıstr Asqar Mamınniń atyna saýal joldady.
«Bul jaǵdaı «Qalamqas» ken ornynda munaı barlaýmen jáne óndirýmen aınalysatyn kompanııalardyń ǵana emes, sondaı-aq jer qoınaýyn paıdalaný, órtten jáne ónerkásip qaýipsizdigi salasyndaǵy memlekettik saıasatty qalyptastyrý men iske asyrý máseleleri zań júzinde júktelgen memlekettik organdardyń olqylyqtaryna baılanysty oryn aldy dep oılaımyn. Onyń ústine, bıylǵy jylǵy 13 naýryzda oryn alǵan apatty oqshaýlaýǵa qajetti ýaqytty jiberip alyp, apatty joıýǵa qajetti kúshter men quraldardyń áleýeti paıdalanylmady, uńǵyda órt shyqqannan keıin ǵana máselege nazar aýdarydy», - dep atap ótti Tóleýbek Muqashev.
Sondaı-aq, Tóleýbek Muqashev memlekettik jáne jeke órt sóndirý kúshteriniń osyndaı apatty joıýǵa qajetti eshqandaı quraldary men múmkindikteri joq ekenin jetkizdi.
«Joǵaryda aıtylǵan jaǵdaı qaýipti óndiris obektilerindegi jazataıym oqıǵalar men jaǵdaıattardan týyndaıtyn qaýipti óndiristik kórinisterdiń zııandy áserlerin boldyrmaýǵa arnalǵan ónerkásip qaýipsizdigi salasyndaǵy tıisti memlekettik qadaǵalaý júrgizilmegenin kórsetti. Oǵan qosa, negizgi qyzmeti osyndaı deńgeıdegi órtti joıa alatyn, respýblıkanyń barlyq ónerkásipti aımaqtarynda jumys isteıtin ári 13 fılıaly bar elimizdegi jalǵyz memlekettik kásibı áskerılendirilgen avarııalyq-qutqarý qyzmeti 2018 jyly jekeshelenip ketti»,- dedi ol.
Osyndaı máselelerdi kótergen senator atalǵan jaǵdaılarǵa jol bermeý úshin Úkimet bolashaqta qandaı sharalar qabyldaýdy josparlap otyr? Elimizdegi kásibı apatta qutqarý qyzmetteri men tótenshe jaǵdaılardy jáne olardyń zardaptaryn joıý jónindegi bólimshelerdiń respýblıkadaǵy barlyq qaýipti óndiris nysandaryna qyzmet kórsetý jaǵdaıy qandaı? degen sııaqty saýaldar túıdegin Úkimet basshysy atyna joldady.
Aıta keteıik, 13 naýryzda Mańǵystaý aýdanyndaǵy «MańǵystaýMunaıGaz» AQ-nyń «Qalamqas» munaı-gaz ken ornynda «Sı Bý» ınjenerlik burǵylaý kompanııasy» JShS №8237 uńǵymasyn burǵylaý barysynda gaz-sý qospasy atqylady. Al 25 naýryz kúni saǵat 07:10-da Mańǵystaý oblystyq TJD kezekshi-dıspetcherlik qyzmetine «Qalamqas» ken ornyndaǵy uńǵymadan shyqqan gaz janyp, bıikti 10 metrge deıin jalyn atqylap turǵandyǵy habarlandy.
Búgin QR Energetıka mınıstrligi ken ornyndaǵy órttiń tolyǵymen sóndirilgenin málimdedi.
