Senator Q.Aıtahanuly mal urlaýshylardy qatań jazalap, múlkin tárkileýdi usynady
ASTANA. QazAqparat - Mal urlyǵyna qatysty jazany aýyrlatyp, ondaı qylmyskerdiń múlkin tárkileý kerek. Búgin Parlament Senatynyń jalpy otyrysynda Qylmystyq kodeks jobasyn talqylaý barysynda senator Qýanysh Aıtahanuly osyndaı usynys aıtty.
Talqylaý barysynda sóz sóılegen senator búgingi kúni elimizdegi respýblıka jurtshylyǵynyń 45 paıyzy aýylda turatynyn, al olardyń basym bóliginiń tabys kózi - mal sharýashylyǵy. «Alaıda, elimizde barǵan saıyn mal urlyǵy órshı túsýde. Jyl on eki aı boıy kútip-baǵyp, sol arqyly kúnin kórip otyrǵan malynan bir kúnde aıyrylyp qalý - aýyl turǵyndary úshin úlken qasiret. Al qoldanystaǵy tájirıbede mal urlyǵy orta sanattaǵy qylmysqa jatqyzylǵandyqtan, qylmyskerler kóbinese shartty túrde sottalady da, jábirlenýshige keltirilgen materıaldyq shyǵyn qaıtarymsyz qalyp jatyr», - dedi depýtat Qýanysh Aıtahanuly. Onyń aıtýynsha, mal urlyǵymen aınalysatyn qylmyskerler qazir jazadan ońaı qutylady, sosyn qaıtadan «kásibine» kirisedi. Bir sózben aıtqanda, aýyldy jerlerde mal urlyǵy tyıylmaı otyr. «Osyǵan baılanysty, jańa Qylmystyq kodekstiń urlyqqa qatysty 188-babyndaǵy jazany aýyrlatyp, jábirlenýshige keltirilgen materıaldyq shyǵyndy eselep qaıtarý úshin aıyppul mólsherin arttyryp, olardyń múlkin tárkileý kerek dep esepteımin», - dedi Qýanysh Aıtahanuly.
