Senator Q. Aıtahanov stýdentter arasynda aýyl jastarynyń úlesi azaıyp bara jatqanyna alańdaýshylyq bildirdi
ASTANA. 13 qyrkúıek. QazAqparat - Stýdentter arasynda aýyl jastarynyń úlesi jyl saıyn azaıyp barady.
Búgin QR Parlamenti Senatynyń jalpy otyrysynda Úkimet basshysynyń atyna depýtattyq saýal joldaǵan senator Qýanysh Aıtahanov osylaı málim etti.
Saýal barysynda senator elimizde jyl saıyn joǵary oqý oryndarynyń oqý aqysy qymbattap bara jatqanyn, al bunyń qarapaıym aýyl turǵandarynyń jaǵdaıyna áser etip otyrǵanyn atap ótti. «Elimizdiń aldyńǵy qatarly joǵarǵy oqý oryndarynyń biri Qazaq-Brıtan tehnıkalyq ýnıversıtetiniń qarjy-munaı salasyndaǵy mamandyqtarynyń oqý aqysy jylyna 1,5 mln. teńgeden asady. Aqyly oqýdyń eń arzany 350-400 myń teńge aralyǵynda. Bir úıde eki bala stýdent bolsa, jyl saıyn oqý aqysynyń ózine 700-800 myń teńge qarjy kerek. Bul jaǵdaı, kóp balaly aýyl turǵyndarynyń mektep bitirýshi balalarynyń joǵarǵy bilim alý múmkindigin shekteýde. Osylaı bola berse joǵarǵy oqý oryndarynda tek qaltaly azamattardyń balalary ǵana oqıtyn bolady. Talaı ǵalym men daryndardyń aýyldan qarapaıym otbasylardan shyqqanyn eskersek, munyń ózi aýyl jastaryna jasalyp otyrǵan ádiletsizdik ekeni sózsiz», - deıdi depýtat.
Sonymen qatar, Qýanysh Aıtahanov ár jańa oqý jyly saıyn oqý aqysynyń óse túsýi jalpy stýdentter sanynyń azaıýyna da yqpal etip otyrǵanyn da aıtty. Máselen, depýtattyń málimetinshe, 2005-2006 oqý jylynda elimizdegi joǵarǵy oqý oryndarynda 775 762 stýdent bilim alsa, 2011-2012 oqý jyly stýdentter sany 19%-ǵa azaıǵan. Bul negizinen aýyl jastarynyń esebinen bolyp otyr.
«Aýyldyq jerlerde halqymyzdyń jartysyna jýyǵy turatynyna qaramastan joǵary oqý oryndaryna qabyldanǵan stýdentter ishinde aýyl jastarynyń úlesi jyl saıyn azaıýda. Mysaly: 2005-2006 oqý jylynda joǵary oqý oryndaryna 90 324 aýyl jastary qabyldansa, 2008 jyly onyń sany 54 210 nemese 40%-ǵa tómendegen. Al, 2009 jyldan beri memlekettik kvota boıynsha túsken aýyl jastarynyń sanynan basqa aýyl jastarynyń oqýy týraly málimetter statıstıkalyq bıýlletenderden alynyp tastaǵan. Eger osylaı jalǵasa berse erteń halqymyzdyń da sapalyq kórsetkishi tómendeı bereri anyq. Bul elimizdiń bolashaǵy úshin qaýipti», - deıdi senator Q. Aıtahanuly.
