Senator Q. Aıtahanov «Naýryznama» tujyrymdamasyn ázirleý týraly másele kóterdi
Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanov osylaı málim etti.
«Búginde, Naýryz merekesi Qazaqstan halqyna tán jalpyǵa ortaq qundylyqqa, eldik dástúrge aınaldy. Elbasy N.Nazarbaev «Ejelden jyl basy bolyp esepteletin, jańarý men jasarýdyń, yntymaq pen berekeniń, tatýlyq pen kelisimniń merekesi Naýryz elimizde jańa jyl merekesi retinde toılanatyn bolýy kerek» - degen bolatyn. Alaıda, Ulystyń uly kúni Naýryzdy Jańa jyl merekesine laıyqty dárejede atap óte almaı júrgenimiz týraly qoǵamda ár túrli pikirler aıtylyp júr», - dedi senator Q. Aıtahanov. Bul rette depýtat qazirgi kezde, Naýryz elimizdiń ár óńirinde ártúrli deńgeıde ótkizilip otyrǵanyna nazar aýdardy. Máselen, batysta Naýryz merekesi 14 naýryzdan «kórisý kúnderi» bolyp bastalsa, kóptegen óńirlerde meıram folklorlyq-etnografııalyq merekege aınalyp bara jatqan sekildi.
«Kópshiliktiń kókeıinde júrgen osy bir ıgi iske Ońtústik Qazaqstan oblysy basshylyǵy bıylǵy jyly erekshe mán berip, Ulystyń uly kúni Naýryz merekesin 14-23 naýryz aralyǵynda, ıaǵnı 9 kún boıy jańa sıpatta uıymdastyryp, halqymyzdyń kóneden kele jatqan «Naýryznama» dástúrin zaman, qoǵam talabyna saı qaıta jańǵyrtty. Bıylǵy Naýryzda ońtústikte ár kún ózindik ereksheliktermen, tárbıelik máni bar istermen órnekteldi», - deı kele senator ondaǵy árbir ataýly kúnniń erekshelikterine toqtaldy.
«Bıylǵy jyly Naýryz merekesin toılaýda respýblıka óńirlerinde ártúrli jańasha oı, is-sharalar usynyldy. Endi, óńirlerdegi Naýryz merekesin ótkizýge baılanysty atqarylyp jatqan ár alýan is-sharalardy jınaqtap, áz Naýryzdy tereń mazmundy, maǵynaly etip ótkizýdiń baǵdarlama-jobasyn oılastyrǵan jón sııaqty. Ulystyń uly kúni, jyl basy Naýryzdyń halqymyzdyń yrysy men yntymaǵynyń, birligi men tatýlyǵynyń nyǵaıýyna, salt-dástúrimizdiń, tilimizdiń órkendep, damýyna qosatyn úlken úlesin eskere otyryp Naýryz merekesiniń búkilhalyqtyq sıpat alýyna, onyń mazmunyn, tárbıelik mánin odan ári tereńdete berý maqsatynda respýblıkada «Naýryznama» baǵdarlamasyn (tujyrymdamasyn) ázirlep, jınaqtalǵan jaqsy dástúrdi halyqqa keńinen taratýǵa Úkimet tarapynan yqpal etilse eken», - dedi senator.
