Senator Q. Aıtahanov «Balalar kapıtaly qoryn» qurý máselesin kóterdi
ASTANA. 13 jeltoqsan. QazAqparat - «Balalar kapıtaly qoryn» engizý qajet. Búgin QR Parlamenti Senatynyń jalpy otyrysynda «Memlekettik bilim berý jınaqtaý júıesi týraly» zańyn talqylaý barysynda senator Qýanysh Aıtahanov osy máseleni kóterdi.
«Elimizdegi kúrdeli másele - demografııa. Jerimiz keń, halqymyzdyń sany az. Sol úshin árbir is-sharamyzdy demografııalyq jaǵdaıdy jaqsartýǵa baǵyttaýǵa tıispiz», - dedi Qýanysh Aıtahanov.
Soǵan oraı, depýtat keleshekte bala týý arqyly eldiń demografııalyq jaǵdaıyn jaqsartý úshin, sondaı-aq aýyldaǵy kópbalaly otbasy balalarynyń bilim alýyna jaǵdaı jasaý úshin «Balalar kapıtaly qoryn» engizý qajettigin kóterdi.
«Kóp otbasylarda sábı sany 1-2-eý ǵana. Al sonyń sanyn arttyrý úshin elimizde ár otbasynda týylǵan úshinshi sábıden bastap olar úshin memleket tarapynan arnaıy qarjy bólinse, sodan keıingi ár týylǵan bala úshin bólinetin qarjynyń kólemi artyp otyratyn bolsa. Ata-ana bul qarjyny tek balanyń bilim alýyna jumsaıtyn bolsa. Sonda memleket tarapynan da, ata-ana tarapynan da balanyń bolashaǵyna, bilimine, sondaı-aq demografııany yntalandyrýǵa jaǵdaı jasalǵan bolar edi», - deıdi senator. Onyń aıtýynsha, bundaı qadam arqyly halqymyzdyń sany kóbeıip, kópbalaly otbasyndaǵy balalardyń joǵary bilimge qoljetimdiligi qamtylady.
