Senator: Ipotekalyq qaryz beretin ekinshi deńgeıli bankterge baqylaýdy kúsheıtý kerek
Úkimet basshysyna depýtattyq saýal joldaǵan depýtattar balama nusqalar usynbaı turyp azamattardy jalǵyz turǵyn úıinen májbúrlep shyǵarýǵa jol bermeýge Úkimettiń nazaryn aýdarýǵa tyrysty.
Naqtyraq aıtqanda Senat tóraǵasynyń orynbasary Asqar Shákirov pen depýtat Lázzat Súleımen osy máselege baılanysty QR Premer-mınıstrine depýtattyq saýal joldady.
«Qazir úı alý kezeginde shamamen 530 myńǵa jýyq adam tur. Jyl saıyn olardyń sany taǵy 50 myń adamǵa kóbeıedi. «Nurly jer» baǵdarlamasyna kiretin «Shańyraq» qanatqaqty jobasy ákimdikterde turǵyn úı alýǵa kezekte turǵandarǵa ıpotekalyq nesıe berýdi kózdeıdi. Nesıe alý úshin otbasynyń ár múshesiniń tabysy aıyna 3,1 eselik eń tómengi kúnkóris deńgeıinen (32 668 teńge) aspaýy tıis. Ol halyqtyń tabysy az adamdarǵa arnalǵanyn kórsetedi. Zeınetaqy qorynan beriletin sońǵy alty aıdyń úzindi kóshirmesi - kiristerdi rastaý nysany», - dedi Senat otyrysynda depýtattyq saýaldy oqyǵan Lázzat Súleımen.
Onyń aıtýynsha osy jobany iske asyrý tájirıbesi kórsetkendeı, baspana osal sanattaǵy, onyń ishinde múmkindikteri shekteýli azamattar úshin qoljetimsiz bolyp otyr.
«Máselen, І jáne ІІ toptaǵy múgedektigi bar adamdar olardyń eńbek tabysyn rastaýdyń bolmaýyna baılanysty jeńildetilgen ıpotekalyq kredıt ala almaıdy. Bul azamattardyń ádette resmı jumysqa ornalasýǵa jáne tıisinshe zeınetaqy qoryna jarna aýdarýǵa múmkindigi joq», - dedi Lázzat Súleımen.
Depýtat sondaı-aq «7-20-25» baǵdarlamasy kezek pen tirkeýsiz, biraq tabystary 3,1 eselik eń tómengi kúnkóris deńgeıinen joǵary azamattardy turǵyn úımen qamtamasyz etýge baǵyttalǵanyn atap ótti. Atalǵan baǵdarlama kóptegen qazaqstandyqtar úshin edáýir qoljetimdi bolǵanymen bastapqy turǵyn úı naryǵynda ǵana jumys isteıdi.
«Sonymen birge paıdalanýǵa qoldanysqa engizý sátindegi turǵyn úıdi tabý, ádette óte qıyn, sebebi bastapqy turǵyn úı naryǵy páterlerdi keıinnen qaıta satý úshin birneshe páterdi bir ýaqytta satyp alatyn alypsatarlar qyzmetiniń nysany bolyp otyr. Osyǵan baılanysty azamattar aldyn ala brondaý shartymen turǵyn úı satyp alýǵa jáne turǵyn úı paıdalanýǵa berilgennen keıin ǵana atalǵan baǵdarlama boıynsha ıpotekalyq kredıtti resimdeýge májbúr bolady», - dedi Senat depýtaty.
Senatorlar májbúrlep shyǵarýǵa tyıym salý negizderiniń tizimi sapaly túrde jan-jaqty qaıta qaralýy kerek ekenin, sondaı-aq aldyn alý sharalaryn qabyldaý, atap aıtqanda azamattardyń ıpotekalyq qaryzdy tóleý jónindegi táýekelderi men múmkindikterine muqııat taldaý júrgize otyryp, azamattarǵa ıpotekalyq qaryzdar berý kezinde ekinshi deńgeıli bankterdiń baqylaýyn kúsheıtý qajettigin atap kórsetti.
