Senator I.Adyrbekov Lıtva Elshisimen halyqaralyq yntymaqtastyq salasyndaǵy birqatar máselelerdi talqylady
ASTANA. QazAqparat - Búgin Qazaqstan Respýblıkasy Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Ikram Adyrbekov Lıtva Respýblıkasynyń Qazaqstandaǵy Tótenshe jáne Ókiletti Elshisi Vıtaýtas Naýdýjasty onyń ótinishi boıynsha qabyldady.
Kezdesýde eki el arasyndaǵy ózara qatynastardy, onyń ishinde parlamentaralyq baılanystardy keńeıtý máseleleri talqylandy.
Elshi Lıtva Ýkraın shıelenisine, terrorızmmen kúreske, qaqtyǵys aımaqtaryndaǵy beıbit turǵyndardy qorǵaýǵa, jahandyq qaýipsizdikti jáne adam quqyqtaryn qamtamasyz etý máselelerine erekshe nazar aýdaryp kele jatqanyn atap ótti.
Odan basqa, Elshi komıtet tóraǵasy I.Adyrbekovtiń EQYU Parlamenttik Assambleıasynyń bıylǵy aqpandaǵy Venadaǵy 14-shi Qysqy sessııasyna qatysýy jáne Qazaqstan Respýblıkasynyń Prezıdentiniń Arnaýly ýákili retinde 2017-2018 jyldarda BUU Qaýipsizdik Keńesiniń turaqty emes músheligine Qazaqstannyń kandıdatýrasyn ilgeriletý jóninde Baltyq elderine jumys babyndaǵy saparynyń mańyzdylyǵyn atap ótti. Ol sapar aıasynda joǵary deńgeıdegi ekijaqty kezdesýler josparlanyp otyr.
Sonymen birge taraptar júzdesý barysynda halyqaralyq yntymaqtastyq salasyndaǵy birqatar máselelerdi talqylady.
