Senator GMO ónimderine tosqaýyl qoıýǵa qatysty usynystar aıtty
Ol óz sózinde jaqynda qaýipti vırýs tabyldy degen sebeppen qazaqstandyq tomat pen burysh ónimderin Reseıge kirgizýge tyıym salynǵanyna nazar aýdaryp, buǵan zerthanalardyń atalǵan baǵyttaǵy mardymsyz jumysy da sebep bolǵanyn jetkizdi.
«Mundaı saýda soǵysynda taýardyń sapasyn ǵylymı turǵydan rastaý basty dálel bolyp sanalady. Al bizdiń zerthanalyq bazamyzdyń jaǵdaıy eshqandaı syn kótermeıdi. On jyl boıy biz ósimdikter karantıni boıynsha zerthanany jóndi uıymdastyra almaı kelemiz. Ne zamanaýı baza, ne zertteýdiń qazirgi ádisterin meńgergen kásibı mamandar joq», - dedi A. Kúrishbaev.
Osy rette depýtat bul jumysqa jaýapty laýazymdy tulǵalarǵa óz keńesin berdi.
«Máskeýge baryp, Búkilreseılik ósimdikter karantıni ǵylymı-zertteý ınstıtýtynyń qalaı jumys isteıtinin kórseńizder, bizdiń qanshalyqty artta qalǵanymyzdy túsiner edińizder», – dedi senator.
Depýtattyń aıtýynsha, elimizde gendik modıfıkatsııalanǵan organızmder (GMO) ónimderin zertteý júıesindegi jaǵdaı da osyndaı. Sondyqtan Qazaqstanǵa gendik modıfıkatsııalanǵan tamaq ónimderiniń jáne tuqymdyq materıalynyń kirý qaýpi óte joǵary.
«Bul máselelerdiń ekonomıkamyz jáne azamattarymyzdyń densaýlyǵy úshin asa mańyzdy ekenin eskerip, saraptamalyq qyzmet kórsetetin barlyq zerthanalarǵa revızııa júrgizgen jón dep esepteımin. Sondaı-aq, olardy zamanaýı deńgeıde kadrlyq, tehnıkalyq jáne ádistemelik turǵydan qamtamasyz etip, elimizdegi saraptama júrgizetin mekemelerdi jańǵyrtýǵa qatysty tıisti sharalar qabyldaý qajet dep sanaımyn», – dedi Senat depýtaty Aqylbek Kúrishbaev.