Senator Ǵarıfolla Esim Óner akademııasynyń stýdentterimen kezdesti
;ALMATY. Qarashanyń 26-y. QazAqparat /Názıra Eleýhan/ - Búgin QR Parlamenti Senatynyń depýtaty, akademık Ǵarıfolla Esim T.Júrgenov atyndaǵy Qazaq ulttyq óner akademııasynyń ujymymen kezdesti,
dep habarlaıdy QazAqparat.
Kezdesý barysynda fılosof-ǵalym «Ulttyq ıdeıa degenimiz ne? Meni osy másele oılandyryp júr, egemendigimizdi alǵannan beri elimiz jańa arnaǵa tústi», dep aıta kele, «erteńgi kúndi jasaıtyn biz, sondyqtan, erteń qaıda bara jatqanymyzdy oılanýymyz kerek», degen oı tastady. Sondaı-aq Elbasynyń «Ulttyq ıdeıa» jóninde tikeleı efır kezinde aıtqan 4 másele; «El birligi», «Básekege qabiletti ekonomıka», «Jasampaz ıntellektýaldyq qoǵam», «Órkenıetti memleket» týraly stýdentterge óz pikirin aıtyp, ulttyq ıdeıanyń máni men mańyzyn túsindirip berdi. «Damyǵan 50 el qataryna ený úshin, básekege qabiletti ekonomıka bolýy kerek, básekege qabiletti ónim óndirýimiz kerek», dedi ol. Sonymen qatar, senator stýdentterdiń suraqtaryna jaýap berdi.
Depýtattyń aıtýynsha, kezdesýdiń negizgi maqsaty - el táýelsizdigin nyǵaıtýdaǵy ulttyq ıdeıanyń mán-mańyzy týraly bolashaq óner mamandarymen keńinen suhbattasyp, oı bólisý.
Ǵarıfolla Esim saıasat, mádenıet jáne áleýmettik-turmys máselelerine arnalǵan 300-den asa pýblıtsıstıkalyq, ǵylymı-tanymdyq eńbekter jazǵan qarymdy qalamger. Ol - «Tańsulý», «Kúná», «Kósem-Kókjal», «Bógde sezim» atty shyǵarmalardyń avtory.
