Senator Ǵ. Qasymov Azamattyq avıatsııa agenttigin qurýdy usyndy
ASTANA. 7 naýryz. QazAqparat - Qazaqstanda derbes Azamattyq avıatsııa agenttigin qurý kerek. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Ǵanı Qasymov osy máseleni kóterdi.
«Sońǵy jyldary elimizdiń avıatsııa salasynda kúrdeli jaǵdaılar týyndap jatqanyn baıqap júrmiz. Biz bul problemalardy árbir avıaapattar tóńireginde qarastyryp ta júrmiz. Al jalpy problemany júıeli túrde qarap, bizge ne jetispeıtindigine, kemshilik qaıda ekendigine nazar aýdarǵan joqpyz», - deıdi senator. Onyń aıtýynsha, bul saladaǵy memlekettik nazar aýdarýdy qajet etetin basty másele - avıabaqylaýdyń memlekettik derbes baqylaýy bolyp otyr. Senatordyń sózinshe, bundaı organ eshqandaı da vedomstvoǵa táýeldi bolmaı, tikeleı úkimetke qarasty bolýy shart.
«Elimizde ushý qaýipsizdigi boıynsha ınspektsııa joq. Bálkim, ushý qaýipsizdigin baqylaıtyn organy joq birden bir memleket biz shyǵarmyz», - deıdi Ǵanı Qasymov.
«Biz avıaapat tragedııalaryn zertteýdi ǵana qarastyrmaýymyz kerek, avıatsııa salasynyń damý bolashaǵynyń áleýetin qamtamasyz etýge tıispiz. Osyǵan oraı, elimizde azamattyq avıatsııa salasyna jańa baǵytty, jańa memlekettik talaptardy aıqyndaıtyn táýelsiz komıssııa kerek. Múmkin Qazaqstannyń azamattyq avıatsııa jónindegi derbes agenttigin qurý kerek shyǵar. Eger ondaı agenttik qurylatyn bolsa, onyń qaramaǵyna elimizdegi azamattyq avıatsııa akademııasyn berý qajet. Sol akademııada ulttyq kásibı avıamamandar daıarlanýy shart», - dedi ol.
