Senator Ǵ. Esim Úkimetten «Qazaq eliniń tarıhy jáne fılosofııasy» ınstıtýtyn qurýdy suraıdy

ASTANA. 27 maýsym. QazAqparat - Astanada «Qazaq eliniń tarıhy jáne fılosofııasy» ǵylymı-zertteý ınstıtýty qurylsa ıgi. Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Ǵarıfolla Esim osylaı málim etti.

«Elbasy N. Nazarbaev «Qazaqstan-2050» strategııasyn aıqyndaǵan Joldaýynda tuńǵysh ret elimizdi «Qazaq memleketi» dep ataıtyn bolamyz» degen túıin jasady. Jalpy Qazaq eliniń tarıhı sanasyn qalyptastyrý - asa mańyzdy memlekettik deńgeıde atqarylatyn is. Otandyq tarıhty zerdeleý jónindegi keńeste Memlekettik hatshy Marat Tájın «ýaqyt tarıh ǵylymynyń aldynda múldem jańa talaptar qoıyp otyrǵanyn» aıtqan edi», - dedi senator.

Sonymen qatar, Ǵ. Esim táýelsizdikten beri Qazaq eli keshenin qalyptasyp, Máńgilik el qaǵıdasy ornyqqanyna toqtaldy.

«Osyǵan oraı, Joldaýda aıtylǵandaı «bir - el, bir - halyq» tujyrymy zaman talabyna saı zerdeleı alatyn Astana qalasynda jańa ǵylymı-zertteý ınstıtýtyn qurý qajettiligi týyp otyr. Táýelsiz Qazaq eliniń tarıhy oqýlyǵy jazylýy kerek. Qazaq tarıhy dúnıetanymymen birge órilgen. Sondyqtan da, ǵylymı-zertteý ınstıtýtyn «Qazaq eliniń tarıhy jáne fılosofııasy» dep atalsa degen ıgi tilek bildiremiz», - dedi depýtat Ǵ. Esim.

Osy rette senator kezinde kommýnıstik-keńestik ıdeologııalar aıasynda gýmanıtarlyq-qoǵamdyq ǵylymı zertteý ınstıtýttary men ortalyqtarynyń zaman talabyna saı qajettilikterdi qanaǵattandyra almaı otyrǵanyn atap ótti. «Qazaq eliniń tarıhy men dúnıetanymyn paıymdaýda tyń kózqaras qalyptastyratyn ǵylymı-zertteý ınstıtýtyn qurý zaman talaby», - deıdi depýtat.