Senator Ǵ. Esim birqatar qalalardaǵy pedagogıkalyq ınstıtýttardyń mártebesin kóterýdi usynady
ASTANA. 9 maýsym. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda senator Ǵarıfolla Esim elimizdegi pedagog mamandarynyń tapshylyǵan baılanysty másele kóterip, Úkimet basshysynyń atyna saýal joldady.
Senator Ǵarıfolla Esim osydan eki jyl buryn Arqalyq, Semeı, Taraz, Qostanaı, Pavlodar, Aqtóbe pedagogıkalyq ınstıtýttaryna ýnıversıtet mártebesin berýdi kótergen edi. Búgingi Úkimet basshysynyń atyna joldanǵan saýalda da depýtat osy máselege aınalyp soqty. «Elbasynyń 2010 jylǵy 7 jeltoqsandaǵy № 1118 Jarlyǵymen bekitilgen Qazaqstan Respýblıkasynda bilim berýdi damytýdyń 2011-2020 jyldarǵa arnalǵan memlekettik baǵdarlamasynda pedagog mártebesin kóterý máselesi jan-jaqty aıtylǵan. Pedagog mártebesin kóterý máselesi pedagogtardy joǵary oqý oryndarynda daıarlaýmen tikeleı baılanysty. Pedagogtar ýnıversıtettik dárejedegi oqý oryndarynda daıarlanýy zaman talaby. Mundaı úrdis elimizde bar. Aıtalyq, Abaı atyndaǵy Ulttyq pedagogıkalyq ýnıversıteti men Qazaq memlekettik Qyzdar pedagogıkalyq ýnıversıteti. Nelikten aımaqtardaǵy pedagog daıarlaıtyn oqý oryndary osyndaı deńgeıge kóterilmeı otyr?», - deıdi Ǵ. Esim.
Sonymen qatar, senator bilim baǵdarlamasyna toqtala kele, onda 2015 jyldan bastap 12 jyldyq oqý úrdisine kóshý kózdelgenin, osynyń ózi pedagogtar daıarlaý máselesin jańa sapalyq deńgeıge kóterýdi qajet etetinin atap ótti. «Búgingi tańda jumys isteıtin árbir besinshi muǵalimniń jasy 50-den asqan. Jyl saıynǵy jas kadrlardyń pedagog mamandyǵy boıynsha jumysqa kelýi 2,6 paıyzdy qurap otyr. Bul elimizdegi pedagogıkalyq mamandyqtyń mártebesine qyzyǵýshylyqtyń báseńdigin kórsetedi. Bilimdi pedagog daıyndaý bul bolashaqqa degen ınvestıtsııa. Sondyqtan joǵaryda atalǵan pedagogıkalyq ınstıtýttardy ýnıversıtet deńgeıine kóterýdiń múmkindikterin qarastyrýyńyzdy usynamyn», - dedi Ǵ. Esim.
