Senator esirtkilik zattar boıynsha medıtsınalyq kýálandyrý júıesin jetildirýdi usyndy

ASTANA. KAZINFORM — Esirtkilik jáne ýytqumarlyq masaıýdy medıtsınalyq kýálandyrý júıesindegi júıeli olqylyqtar qoǵam qaýipsizdigine qaýip tóndirip otyr. Jyl saıyn aıqyn mas kúıindegi adamdardyń «mas emes» dep tanylý jaǵdaılary artyp keledi. Bul máseleni senator Janna Asanova kóterdi.

«Mas bolǵany anyq belgili adamdardyń medıtsınalyq kýálandyrý qorytyndysy boıynsha «mas emes» dep tanylý jaǵdaıy jıilep ketti. Bul qoldanystaǵy kýálandyrý ádisteriniń júıelik máselelerin baıqatyp otyr, ásirese, jańa psıhoaktıvti zattar men ıngalıanttardyń ýytty áserin anyqtaý bóliginde júıeli olqylyqtar bary anyqtaldy», – dedi J. Asanova Premer-mınıstrdiń atyna joldaǵan depýtattyq saýalynda.

Senatordyń aıtýynsha, qazirgi qoldanylyp júrgen zerthanalyq ádister sıntetıkalyq kannabınoıdtar jáne jasóspirimder jıi qoldanatyn ıngalıanttardy anyqtaýǵa qaýqarsyz.

Atalǵan zattardyń áseri tez ótetindikten ári olardyń saýdasy shekteýsiz bolǵandyqtan, polıtsııa men medıtsına qyzmetkerleri mundaı jaǵdaılarǵa tıimdi áreket ete almaı otyr.

«Zattar tizbesin jańartýdyń jedel tetiginiń bolmaýy, dıagnostıka ádistemesiniń kenje qalýy jáne zerthanalardyń tehnıkalyq jabdyqtalýynyń jetkiliksizdig qoǵamdyq qaýipsizdiktiń tómendeýine alyp keledi. Halyqaralyq hattamalar dıagnostıkalanatyn zattar tizbesin jylyna keminde 1 ret ózgertýdi, joǵary dáldiktegi ádisterdi qoldana otyryp zerthana aýqymyn keńeıtýdi, sondaı-aq medıtsınalyq personaldy psıhoaktıvti zattardyń jańa túrlerimen jumys isteýge daıyndaýdy kózdeıdi», – dedi depýtat. 

Osy oraıda ol medıtsınalyq kýálandyrý salasyndaǵy normatıvtik jáne tehnıkalyq bazany keshendi túrde jańǵyrtýdy usyndy.

Aıta keteıik, bıyl úsh aıda búkil el boıynsha tyıym salynǵan zattardy saqtaýǵa jáne taratýǵa qatysy bar degen kúdikpen 23 jasóspirim ustaldy.