Senator Erǵalıev jańa úkimet emdik shópter máselesin qaperge alatynyna úmitti
Alaıda burynǵy úkimet onyń bul usynysyn qaperge ilmegen, dep xabarlaıdy QazAqparat tilshisi.
"Osydan eki jyl buryn Senattyń plenarlyq májilisinde Qazaqstannyń ósimdik álemin qorǵaý týraly zań qajettigin qozǵaǵan bolatynmyn. Sol kezdegi úkimet bul máseleni qabyldaı qoımady. Alaıda alańdatarlyq jaǵdaıdyń bar ekenine taǵy bir márte nazar aýdarǵym keledi. Bizdiń ǵalymdarymyzdyń qazirgi málimetteri boıynsha Qazaqstanda óte sırek kezdesetin, bolmasa, joıylyp ketýdiń az-aq aldynda turǵan 387 ósimdik túrleri Qyzyl kitapqa engizilgen. Bizde jıi oryn ala bastaǵan orman jáne dalaly aımaq órtiniń kesirinen jáne dárilik-emdik ósimdik túrlerine degen álemdik naryqtaǵy suranystyń jyl saıyn kúrt óse túsýine oraı, aldaǵy ýaqytta joıylyp keter ósimdik túrleri kóbeımese de, azaımaıtyny anyq", - dedi J.Erǵalıev Parlament Senatynda Qazaqstannyń bıoalýandylyǵyn saqtaý máselesine arnalǵan qoǵamdyq tyńdaýlarda.
Onyń aıtýynsha, sońǵy jyldary Qazaqstan aýmaǵynan asa baǵaly dárilik ósimdikter men shópterdi jınaý jáne olardy shet elderge shyǵarý baqylaýsyz ketip jatyr. Keden organdarynyń málimetine sáıkes, 2011 jyly Qazaqstannan tys jerlerge bir ǵana mııa tamyrynyń 4 220 tonnasy, 2012 jyly 17 121 tonnasy, al 2013 jyldyń alty aıynda ǵana 9 332 tonnasy eksportqa shyǵarylǵan.
"Búginde Qytaı, Iran, Aýǵanstan men Ózbekstan jerlerinde mııa tamyrynyń qory azaıyp ketkennen keıin qazir ony tek Qazaqstannyń aýmaǵynan ǵana jınap jatyr. Sondyqtan Qazaqstannyń ósimdik álemin qorǵaý týraly zańyn qabyldaýdyń mańyzy týdy dep esepteımiz. Aldaǵy ýaqytta úkimettiń osy máselege mán berýin qalaımyn ", - deıdi J.Erǵalıev.
Osy bastamaǵa senator Muratbaı Joldasbaev ta qosyldy. Onyń sózine qaraǵanda, búginde Ońtústik Qazaqstan, Jambyl men Almaty oblystarynda jylda tamyz aıynda mııa tamyryn jappaı terý jumystary bastalyp otyrady. Zańsyz kásippen jasy da, kárisi de aınalysady. Sóıtip, mııa tamyryn tonnalap Qytaıǵa satyp jiberedi. Sol jerde ony medıtsınalyq maqsattarda paıdalanady.
Senatorlarǵa jaýap bergen aýyl sharýashylyǵy vıtse-mınıstri Erlan Nysanbaev memlekettik orman qoryna kiretin jerlerde ondaı zańsyzdyqtardyń baıqalmaıtynyn jetkizdi. Al odan tys jerlerde mııa tamyryn zańsyz terý jumystary qyzý júredi. Aldaǵy ýaqytta ósimdikter men janýarlar álemine arnalǵan zańnamaǵa ózgerister men tolyqtyrýlar engizip, memlekettik qordan tys jerlerde emdik shópterdi terý jumystaryn retke keltirý josparlanǵan. Sondaı-aq atalǵan shıkizatty shetelge shyǵarǵany úshin jaýapkershilik kúsheıtilmek.