Senator elimizdegi saýda ortalyqtarynda kúzetti kúsheıtýge shaqyrdy
ASTANA. KAZINFORM – Senator Bıbıgúl Jeksenbaı óziniń depýtattyq saýalynda adam kóp jınalatyn oryndarda qaýipsizdikti qamtamasyz etý máselesi týraly aıtty.
Depýtattyń aıtýynsha, Qazaqstanda 7,9 mln sharshy metr saýda alańy bar, biraq olardyń besten bir bóligi ǵana sapa men qaýipsizdik ólshemine saı keledi.
Saýda ári oıyn-saýyq ortalyǵyndaǵy balalardyń oıyn bólmesi ekinshi qabattan joǵary emes jáne evakýatsııalyq esikten 20 metrden qashyq bolmaýy tıis.
Biraq kóptegen saýda ortalyǵynda balalardyń oıyn alańdary joǵarǵy qabatta ornalasqan, evakýatsııa joly da qarastyrylmaǵan.
Evakýatsııa baspaldaǵynda múmkindigi shekteýli jandarǵa arnalǵan pandýs joq.
Saýda ortalyqtarynda bir qabatta ondaǵan tamaqtaný oryndary ornalasqan, bul tamaq pisiretin qýaty joǵary tehnıkany qoldaný saldarynan órt qaýpin arttyrady.
«2023 jyly órt qaýipsizdigi talaptaryn buzýdyń 13 978 deregi tirkelgen. Órt qaýipsizdigin óreskel buzý faktileri men qulyptalǵan nemese tipti shynjyrmen bekitilgen apattyq shyǵý joldary, jaramdylyq merzimi ótken órt sóndirgishter, dabyl jáne órt sóndirý júıeleriniń buzylýy sııaqty faktiler anyqtalǵan. Osynyń bári biryńǵaı zań talabynyń oryndalmaýynan bolǵan. Saýda ortalyqtary ǵımarattyń tehnıkalyq júıesin arnaıy algorıtm boıynsha basqarýǵa qabiletti joǵary tehnologııalyq órt dabylynyń júıesimen jabdyqtalýy tıis. Bul barlyq adamdardy belgili bir ýaqytta órttiń qaýpinen qorǵaýǵa jáne sol arqyly qaýipsiz evakýatsııalaýǵa múmkindik beredi», - dedi Bıbıgúl Jeksenbaı Úkimet basshysy Oljas Bektenovtyń atyna joldaǵan saýalynda.
Sonymen qatar senator elimizde ótetin iri sharalarda jurtshylyqty qorǵaý máselesine toqtaldy. Іri sporttyq sharalardyń qaýipsizdigi aıasynda sheteldik jáne otandyq tájirıbeni eskerýdi, qaýipterdiń aldyn alý úshin keshendi uıymdastyrýǵa qoldaý jasaýdy talap etedi.
«Saýda ári oıyn-saýyq ortalyǵyndaǵy kireberis pen adam kóp jınalatyn jerlerde kúzetti kúsheıtýdiń, sondaı-aq evakýatsııany qamtamasyz etý júıesiniń jumysyn qosymsha testileý jáne jattyǵý evakýatsııasy men aýyzsha habarlaýdyń mańyzyna nazar aýdarýyńyzdy suraımyn. Sondaı-aq, jazǵy demalys aldynda mektepterde jáne joǵary oqý oryndarynda oqýshylardyń qatysýymen qoǵamdyq qaýipsizdik boıynsha arnaıy oqý-jattyǵý ótkizý qajet», - dedi depýtat.
