Senator elimizdegi memlekettik ekologııalyq baqylaýdyń sapasyna kóńili tolmaıtynyn aıtty
NUR-SULTAN. QazAqparat – Búgin Parlament Senatynyń jalpy otyrysynda depýtat Andreı Lýkın eldegi aýa tazalyǵyn baqylaıtyn memlekettik monıtorıngtiń sapasyna alańdaýshylyq bildirdi.
Osy oraıda ol Úkimet basshysynyń orynbasary Roman Sklıardyń atyna saýal joldady, dep habarlaıdy QazAqparat tilshisi.
Onyń aıtýynsha, olqylyqtar men kemshilikter júıeli túrde tirkelgenine qaramastan, ekologııalyq jaǵdaıǵa monıtorıng tıisti deńgeıde júrgizilmeı keledi. Tipti, lastanýdyń kózderin anyqtaý boıynsha sharalar qabyldanbaı otyr jáne zań buzýshylyqtardy joıý, zalaldy óteý jumystary da nashar júrgizilýde.
«Sońǵy 2 jylda elimizdiń aýmaǵynda atmosferalyq aýanyń joǵary deńgeıdegi lastanýy boıynsha 1296 jaǵdaı tirkelgen. Sondaı-aq sý qoımalarynda 934 lastaný deregi anyqtalǵan. Soǵan qaramastan lastaný kózderi anyqtalmaı otyr jáne jyl saıyn 1,5 mlrd teńge jumsalatyn qorshaǵan ortanyń jaı-kúıin baqylaý materıaldary da qoldanylmaı keledi», – dedi Andreı Lýkın.
Senator sońǵy jyldary zııandy óndiris oryndaryn qurý jáne keńeıtý kezinde halyqtyń múddesin eskermeý faktileri jıilep ketkenine de nazar aýdardy.
Depýtat eger bul jaǵdaı ózgermese, elimizdiń florasy men faýnasyna aıtarlyqtaı qaýip tónetinin de atap ótti.
Osyǵan baılanysty senator qaýipti qaldyqtardyń aınalymyn baqylaýdy uıymdastyrý jáne olardy tolyq zalalsyzdandyrý, atmosferalyq aýanyń ekologııalyq problemalaryn sheshý, sondaı-aq zańsyz karerlerdi qalpyna keltirý máselesine qatysty jaýap berýdi surady.
