Senator: Elektr taratýshy kompanııalar shyǵyndy azaıtýǵa múddeli emes

NUR-SULTAN. QazAqparat – Elektr qýatyn taratý kezinde oryn alatyn shyǵyn tarıf esebinen ótelip jatqandyqtan, taratýshy kompanııalar ol shyǵyndy azaıtýǵa múddeli emes. QR Parlamenti Senatynda ótken dóńgelek ústelde senator Súıindik Aldashev osyndaı pikir bildirdi, dep habarlaıdy QazAqparat tilshisi.

«Elektr energııasynyń naryǵy - eń turaqty naryqtardyń biri sanalady. Elektr energııasy árdaıym joǵary suranysqa ıe. Energııa óndirýshi kásiporyndar tutynýshy úshin eshkimmen básekege túsip jatqan joq. Osyndaı qolaıly jaǵdaılar energııa generatsııalaıtyn kompanııalardyń óz qoryn jańǵyrtýyna kepil bola almady. Qazaqstandaǵy negizgi qýat kózderi, onyń ishinde jylý stansalary 40 jyldan astam ýaqyt boıy úzdiksiz qoldanylyp keledi. Bul josparly jáne apattyq jóndeýlerdiń jıileýine túrtki bolyp otyr. Elektr óndirýshi uıymdardaǵy tozý deńgeıi - 53%» - dedi depýtat.

Sondaı-aq, ol energııa taratýshy kompanııalardyń qaraýyndaǵy óńirlik kompanııalardyń jelileri tozǵanynyn problema etip kóterdi.

«Óńirlik energetıkalyq jelilerdegi ortasha tozý kórsetkishi – 66%. Keıbir óńirlerde jelilerdiń tozýy 90%-ǵa deıin jetken. Mysaly, bul kórsetkish «Qaraǵandy REK» JShS-da 91%, «Kókshetaý Energo» JShS, «Batys Qazaqstan REK» AQ jáne «Mejregıonenergotranzıt» JShS-da 80%-dan astam. Elektr qýatyn taratý kezinde orta eseppen 18 paıyzy joǵalady. Ol joǵalǵan shyǵynnyń quny tarıfke qosylady. Bul óz kezeginde kompanııalardy shyǵyn kólemin azaıtýǵa yntalandyrmaıdy», -dedi senator.