Senator elde jobalyq-smetalyq qujattama qunyn negizsiz ósirý sebebin atady
ASTANA. KAZINFORM — Qurylys salasynda jobanyń qunyn qoldan ósirýge bolady, alaıda ony keıin sotta dáleldeý is júzinde múmkin emes. Osy oraıda senator Janna Asanova bıýdjet qarajatynyń qalaı jumsalyp jatqanyna tikeleı qatysty ózekti máseleni kóterdi.
Bul másele jobalyq-smetalyq qujattamaǵa qatysty. Naqty shyǵyndar dál osy qujattarda qalyptasady. Alaıda kúmán týyndaǵan jaǵdaıda, olardyń negizdiligin qoldanystaǵy zańnama aıasynda tekserý is júzinde múmkin bolmaı otyr.
— Joba qunynyń negizsiz ósirilgeni anyq baıqalady, biraq ony zańda belgilengen tártippen dáleldeý múmkin emes. Júıede saraptamalyq qorytyndylardy qaıta teksere alatyn táýelsiz organ joq. Memlekettik saraptama normalarǵa sáıkestigin ǵana tekseredi, alaıda qunynyń negizsiz ósirilýin anyqtamaıdy. Jeke saraptamalyq uıymdardyń jaýapkershiligi jetkiliksiz. Al sot saraptamasy jobalyq qujattamanyń ózin jáne oǵan berilgen qorytyndylardyń zańdylyǵyna jeke taldaýdy qarastyrmaıdy, — dedi senator.
Sonyń saldarynan, zań buzý belgileri aıqyn bolǵan jaǵdaıdyń ózinde, olar quqyqtyq turǵydan baǵalanbaı qalýy múmkin. Máselen, bir jaǵdaıda jobanyń quny túzetýden keıin 700 mıllıon teńgeden astam somaǵa artqan, alaıda ony resmı túrde zań buzý deregi dep taný múmkin bolmaǵan. Sebebi qoldanystaǵy zańnamada mundaı jaǵdaılardy baǵalaýǵa arnalǵan naqty tetik joq.
Osyǵan baılanysty senator saraptamalyq qorytyndylardy jáne shyǵyndardyń negizdiligin tekserýge múmkindik beretin sot saraptamasynyń jańa túrin engizýdi usyndy. Bul óz kezeginde mundaı jaǵdaılarǵa tolyqqandy quqyqtyq baǵa berýge jol ashpaq.
Aıta keteıik, 2025 jyly avtomobıl joldarynyń ómirlik tsıkliniń barlyq kezeńin qamtyǵan sybaılas jemqorlyq táýekelderine keshendi syrtqy taldaý júrgizildi. El óńirlerinde júrgizilgen is-sharalar barysynda 11 mlrd teńge kóleminde smetalyq qunnyń negizsiz ulǵaıtylýy anyqtaldy.
