Senator Elbasynyń Ulytaýda bergen suhbatyna baǵa berdi
ASTANA. QazAqparat - Prezıdenttiń Ulytaýda bergen suhbaty shyn máninde tarıhı sóz boldy. Bul týraly búgin Ortalyq kommýnıkatsııalar qyzmetinde ótken brıfıngte QR Parlamenti Senatynyń depýtaty Nurlan Orazalın aıtty.
«Prezıdentimizdiń Ulytaýdaǵy suhbaty - meniń jadymda uzaqqa saqtalatyn, ómirimdegi eń mańyzdy oqıǵalardyń biri. Árıne, ol suhbatta Elbasymyz túbegeıli jańa sóz aıtty deýden aýlaqpyz, degenmen burynǵy aıtyp kele jatqan tujyrymdary, osyǵan deıingi baǵdarsham oılary, pikirleri jınaqtalyp, qarapaıym tilmen, halyqqa jetimdi de ótimdi túrde qaıta jańǵyryp, mıllıondaǵan aýdıtorııaǵa baǵyshtaldy», - dep atap ótti ol.
Onyń aıtýynsha, bul suhbattyń tarıhı mańyzy bar.
«Bul tarıhı sóz. Tarıhı bolatyn sebebi Prezıdent buǵan deıin Joldaýlarynda, halyqqa arnaýlarynda, suhbattarynda aıtyp kelgen oılaryn tııanaqtap, osynaý bir geosaıası jaǵynan óte kúrdeli kezeńde halyqty tynyshtyqqa, baısaldylyqqa, sabyrlylyqqa shaqyryp otyr», - deıdi senator.
Onyń aıtýynsha, bul suhbatta ultymyzdyń tarıhy da, memlekettiń qalyptasý joly da, din, til, mádenıet, ǵylym máseleleri de jan-jaqty qamtyldy.
Sondaı-aq, senator suhbattaǵy Prezıdenttiń halyqaralyq termınderdi qazaq tiline aýdarý máselesine qatysty aıtqan oıyn da tarqata ketti. Onyń aıtýynsha, bul másele tek qoǵamda ǵana emes, sonymen qatar Parlamentte de qyzý talqylanýda.
«Bul ábden pisip-jetilgen másele dep oılaımyn. Leksıkonymyzdaǵy halyqaralyq termınderdi ońdy-soldy aýdara berý de keıde tilimizge kesirin tıgizedi. Máselen, ınternatsıonalızm degen sóz halyqaralyq termın, ony aýdarýdyń qajeti shamaly. Nemese Prezıdent aıtqandaı, kompozıtor sózi de barlyq tilderde dál solaı aıtyp júr. Al eger másele «samolet» degen sózdiń «ushaq» dep aýdarylǵany týraly bolsa, sóz basqa. Bul jerde barlyǵy óte oryndy aýdarylǵan», - dep atap ótti Senat depýtaty
