Senator Ekinshi dúnıejúzilik soǵystaǵy qazaq ofıtserlerine qatysty aqparatty zertteýdi surady

NUR-SULTAN. QazAqparat – Ekinshi dúnıejúzilik soǵysta shet memleketterde shaıqasqan qazaq ofıtserlerine qatysty aqparattardy elimizdiń dıplomatııalyq elshilikterimen birge zertteý kerek. Bul týraly senator Dana Nurjigitova Qorǵanys mınıstri Nurlan Ermekbaevtyń atyna joldaǵan depýtattyq saýalynda aıtty, dep habarlaıdy QazAqparat tilshisi.

«Búgingi depýtattyq saýalǵa Ekinshi dúnıejúzilik soǵysqa qatysqan qazaq ofıtserleri týraly málimetterdi jınaqtaý jáne jańǵyrtý máselesi sebep bolyp otyr. Ekinshi dúnıejúzilik soǵys, onyń ishinde 1944 jylǵy Petsamo-Kırkenes operatsııasy jáne Norvegııanyń soltústigin azat etý kezinde - norveg jerinde, tutqynda 15 500 keńes jaýyngeriniń ómiri qıylǵan.

Búginge deıin Norvegııa zertteýshileri 9 myńnan astam shet el jaýyngerleriniń aty-jónderin anyqtady. Sol eldegi áskerı zırattar sany 124-ke jetip otyr. Norvegııa jerinde tutqynda bolǵan sheteldik jaýyngerlerdiń aty-jónderin sáıkestendirýmen «Falstad Center» aınalysady. Olar Reseı jáne Germanııa memleketimen tyǵys baılanysta. Atalǵan ortalyqtyń Norvegııa memleketindegi Qazaqstan elshiligine bergen aqparaty boıynsha norvegııa jerinde 32 qazaq ofıtseri jerlengen», - dep toqtaldy depýtat Senattyń jalpy otyrysynda.

Onyń sózine qaraǵanda, Qazaqstan elshiligi Ortalyqtyń aqparattyq bazasymen ary qaraı jumys jasaı otyryp, qosymsha 13 qazaq jaýyngerdiń aty-jónderin anyqtaǵan. Tutqynda bolǵan kóptegen ofıtserler ózderiniń týǵan jerlerin Keńes úkimeti dep kórsetken.

«Sol sebepti zertteý jumystaryn áskerı tarıhshylar men tıisti mamandarmen birge júrgizse, anyqtalatyn aqparattardyń kóptigi sózsiz. Ol jaýyngerler Hetta (Tjøtta) aralynda jerlengen. Qorǵanys mınıstrliginiń «Memorıal» aqparattyq bazasynda qazaq ofıtserleri týraly kezdespegen maǵlumatty Reseı memleketiniń aqparattyq bazalarynan alamyz. Osyǵan sáıkes, aldaǵy ýaqytta Qorǵanys mınıstrligi osy másele boıynsha ózge eldermen ózara aqparat almasýdy sapalyq jańa bıikke kóterýi kerek dep sanaımyz.Uly Jeńistiń 75 jyldyǵyn toılaý qarsańynda Ekinshi dúnıejúzilik soǵys barysynda erlikpen shaıqasqan shet memleketterdegi qazaq ofıtserlerine qatysty aqparattardy elimizdiń dıplomatııalyq elshilikterimen birge zertteý jumystaryn júrgizýdi, anyqtalǵan aqparattardy bir aqparattyq keńistikke úılestirýdi jáne ony jastarǵa patrıottyq tárbıe retinde túrli aqparat kózderinde taratýdy qarastyrýdy suraımyz», - dedi Dana Nurjigitova.