Senator Djon Makkeın ómirden ozdy
VAShINGTON. QazAqparat - Amerıkalyq senator Djon Makkeın 81 jasynda qaterli isik aýrýynan qaıtys boldy, dep habarlaıdy QazAqparat Bı-Bı-Sı agenttigine silteme jasap.
"Senator Djon Sıdnı Makkeın III 2018 jyly jergilikti ýaqytpen 16:28-de qaıtys boldy", - delingen zań shyǵarýshynyń apparaty taratqan málimdemede.
Sondaı-aq onda marqumnyń ómirmen qoshtasar sátinde janynda otbasy músheleriniń bolǵany aıtylady.
Senator apparatyndaǵylar «Makkeınniń 60 jyl boıy Qurama Shtattarǵa adal qyzmet etkenin» atap ótti. Saıasatkerdiń qaıtys bolýyna baılanysty respýblıkalyqtar da, demokrattar da kóńil aıtýda.
24 tamyzda senatordyń otbasy Makkeın derttiń asqynýyna baılanysty em qabyldaýyn toqtatqanyn málimdegen edi.
AQSh senatorynyń dıagnozy týraly 2017 jyly 19 shildede jarııalanǵan. Makkeınniń ókilderi onda sol jylǵy 14 shildede Fınıks qalasyndaǵy (Arızona shtaty) medıtsınalyq ortalyqtyń hırýrgteri sátti ota jasaǵanyn, senatordyń sol kózinen uıyǵan qandy alyp tastaǵanyn habarlaǵan bolatyn.
Djon Makkeın Reseıge qatysty asa qatań syn aıtatyn senatorlar qatarynda edi. Zań shyǵarýshy birneshe ret jańa antıreseılik sanktsııalar engizýge shaqyrǵan bolatyn.
