Senator Dúısenǵazy Mýsın qazaqstandyqtardy el Prezıdentin qoldaýǵa shaqyrdy
Bul týraly QR Parlament Senatynyń baspasóz qyzmeti málim etti.
«Ata-babamyzdyń armany bolǵan, ǵasyrlar boıy armandaǵan, qolymyz jetken Táýelsizdikti qorǵaý búgingi qalyptasyp otyrǵan jaǵdaıda óte mańyzdy. Qoǵamnyń ár múshesi, Qazaqstannyń ár patrıoty, «men qazaqpyn, men qazaqstandyqpyn»,- degen azamattyń búgingi boryshy – osy elimizdegi tynyshtyqty saqtap qalý. Memleket basshysynyń tarapynan qabyldanyp jatqan shuǵyl sharalar halyqtyń oıynan shyǵyp, qazir kúshtik quramdardyń tarapynan, óńirlerde qabyldanyp jatqan sharalar elimizdegi jaǵdaıdy jalpy turaqtandyrdy dep aıta alamyz. Sondyqtan barsha otandastarymyzǵa, barsha qazaqstandyqtarǵa aıtarymyz, osyndaı syn-saǵattarda bir aýyzdy bolyp, memleket basshysynyń qolǵa alyp jatqan is-sharalaryn qoldap, memlekettiń Táýelsizdigi úshin, urpaqtarymyzdyń, bala-shaǵamyzdyń, nemerelerimizdiń bolashaǵy úshin, elimizdiń Táýelsizdigi úshin aıanbaı jumys jasaý kerek dep oılaımyn, soǵan shaqyramyn», - delingen Senattyń baspasóz qyzmeti usynǵan habarlamada.
Saıasattanýshy Rasýl Jumaly da QR Prezıdenti Qasym-Jomart Toqaev eldegi jaǵdaıǵa baılanysty Qazaqstan halqyna joldaǵan úndeýine oraı pikir bildirdgen bolatyn.
«Prezıdenttiń sózine toqtap, qoldaýymyz kerek. Elimizdegi eń batyl, eń sapaly sheshim qabyldaıtyn bir ǵana ınstıtýt qaldy qazir. Ol – Prezıdent. Prezıdenttiń janyna toptasýymyz kerek. Qajet bolsa, qolymyzǵa qarý alyp biz de kóshege shyǵýǵa ázirmiz. Elimizde tártipke qarsy, memleketke qarsy, konstıtýtsııalyq baǵytqa qarsy shyǵyp jatqan azamattar ózderin kópshilikpiz dep oılamasyn. Kópshilik – bizbiz. Jaǵdaıdyń qalaı bolatynyn biz sheshemiz. Sony eskersin», - dedi sarapshy.
