Senator doktorantýrada oqýdyń talaptaryn ózgertýdi surady
ASTANA. QazAqparat - Parlament Senatynyń jalpy otyrysynda senator Dınar Nóketaeva ǵalymdardyń ótinishi boıynsha QR Premer-Mınıstri Baqytjan Saǵyntaevqa depýtattyq saýal joldady, dep habarlaıdy QazAqparat.
«Bizdiń depýtattyq saýalymyzǵa qazaqstandyq ǵalymdarmen kezdesýler jáne olardyń ótinishterin taldaý nátıjeleri negiz bolyp otyr. Joǵary oqý ornynan keıingi bilimniń bilim berý baǵdarlamalaryn iske asyratyn bilim berý uıymdaryna oqýǵa qabyldaýdyń úlgilik qaǵıdalaryna júrgizilgen taldaý nátıjesinde, doktorantýraǵa keminde 3 jyl eńbek ótili bar úmitkerler qabyldanatyny týraly talap JOO-dan keıingi bilimniń halyqaralyq talaptaryna sáıkes kelmeıtinine nazar aýdaryldy. PhD doktorantýraǵa túsýge úmitkerlerdiń eńbek ótiliniń mindetti bolý talaby yqtımal úmitkerlerdiń eńbek jolyn ýnıversıtetten basqa jerde bastaýǵa májbúr etedi. Nátıjesinde, olardyń kóbisi doktorantýra bazasynda oqýdy jalǵastyrýǵa qyzyǵýshylyǵyn joǵaltady. Olardyń keıbir bóligi atalǵandaı shekteýleri joq shet elderdiń joǵary oqý oryndaryna doktorantýraǵa túsýge májbúr bolady. Osy oraıda elimizdiń daryndy jastarynan aıyrylyp qalý qaýpi týyndaıdy», - dedi Nóketaeva.
Onyń paıymynsha, úmitkerlerdiń teorııalyq bilim deńgeıleri úsh jyldyq úzilisten keıin magıstratýradaǵy oqýyn bitirgen kezben salystyrǵanda áldeqaıda tómen bolady. Ony Memlekettik attestatsııalyq komıssııalardyń basshylary doktoranttardy qorytyndy memlekettik attestatsııalaý nátıjeleri jáne olardyń dıssertatsııalaryn qorǵaǵandary boıynsha rastaıdy.
«ıÝNESKO qabyldaǵan qoldanystaǵy Bilim berýdiń halyqaralyq standarttyq jiktelimine sáıkes, doktarantýra bilim alýdyń jalpy úzdiksiz protsesiniń tikeleı bóligi bolyp tabylady. Bul standardta doktarantýraǵa túsýdiń negizgi talaby - aldyńǵy bilim berý deńgeıin (magıstratýrany) ıgerý bolyp aıqyndalǵan, sondaı-aq bilim berý protsesin úzýge, ajyratýǵa ákeletin eshqandaı jasandy shekteýler qarastyrylmaǵan», - dep túsindirdi senator.
Bul turǵyda oqýǵa qabyldaýdyń úlgilik qaǵıdalarynyń «Doktorantýraǵa keminde 3 jyl eńbek ótili jáne «magıstr» dárejesi bar nemese medıtsına mamandyqtary boıynsha rezıdentýrada oqýyn bitirgen adamdar qabyldanady» degen 11-tarmaǵynda keminde 3 jyl eńbek ótili týraly talapty alyp tastaý usynyldy.
