Senator Dáýren Ádilbekov energetıka salasyndaǵy olıgopolııaǵa narazy ekenin aıtty
Atap aıtqanda, senator bul salany qazir elimizde úsh mınıstrlik jáne kvazımemlekettik sektordyń eki kompanııasy basqaratynyn, ıaǵnı biryńǵaı salalyq organ bolmaı turǵanyn ári biryńǵaı ulttyq tarıftik saıasat joq ekenin aıtty.
Senatordyń aıtýynsha, sonymen qatar energetıka salasynda birqatar kompanııalar ózara kirigip ketken, bul olıgopolııa men rásimderdi kórsetpeýge alǵysharttar jasaıdy.
«Energetıka salasynda óndirýshi, energııa jetkizýshi jáne energııamen jabdyqtaýshy uıymdar arasynda tiginen ıntegratsııalanǵan úlestes qurylymdar quryldy, bul osy salada olıgopolııanyń bar ekenin bildiredi. Qazirgi ýaqytta elektr energııasynyń 97%-y saýda protsesi ashyq kórsetilmeıtin tikeleı sharttar boıynsha satylady», - dep atap ótti Dáýren Ádilbekov Úkimet basshysy Álıhan Smaıylovtyń atyna joldaǵan saýalynda.
Senator sondaı-aq «Samuryq-Energo» men «Kegok» kompanııalaryn Energetıka mınıstrliginiń qaramaǵyna berýdi jáne biryńǵaı satyp alýshy júıesine kóshýdi usyndy. Mundaı tásil elektr energııasyn biryńǵaı shekti baǵalar boıynsha satyp alýǵa jáne ony tutynýshylarǵa jarııa talqylaýdan keıin bekitilýi tıis biryńǵaı baǵalar boıynsha satýǵa múmkindik beredi.
«Bir memlekettik organ júzege asyratyn biryńǵaı tarıftik saıasat qajet. Tarıfti kóterý energetıkalyq kásiporyndarǵa qarsy mindettemelerdi, sondaı-aq óndiristi jetildirý, jańartý, jańǵyrtý, shyǵyndardy azaıtý talaptaryn júkteýge tıis. Memlekettiń baqylaý-qadaǵalaý fýnktsııalaryn, onyń ishinde ınvestıtsııalyq kelisimderdiń mindettemelerine, sondaı-aq taýarlar men qyzmetterdi satyp alý protsesine qatysty fýnktsııalardy kúsheıtý kerek», - dedi D. Ádilbekov.
