Senator dárilik preparattardy óndirýde qandaı kedergiler bar ekenin aıtty
Depýtattyń aıtýynsha, qazirgi kezde ıadrolyq medıtsınany damytý salasynda salaaralyq úılestirý bolmaı otyr. Senator bul máseleni alty aı buryn depýtattyq saýalynda kótergen bolatyn.
«Jarty jyl buryn jarııa etken depýtattyq saýalymda Jol kartasy aıasyndaǵy mekemearalyq ózara is-qımyldyń júzege aspaǵany atap ótilgen bolatyn. Onda birqatar máseleni jedel sheshý úshin naqty usynystar berildi. Alaıda alty aıda normatıvtik quqyqtyq aktilerde de, buryn aıtylǵan basqa salalarda da eshqandaı ózgeris bolǵan joq. Jalpy alǵanda, qalyptasqan jaǵdaı bıýrokratııadan aryltý jáne kelisý kezeńderin qysqartý maqsatynda Úkimet janynan mekemearalyq úılestirý organyn qurý qajet ekenin baıqatyp otyr», - dedi A. Arǵynbekova Úkimet basshysy Álıhan Smaıylovtyń atyna joldaǵan saýalynda.
Aınur Arǵynbekova sondaı-aq saladaǵy birazdan beri sheshilmegen problemalardy eske saldy. Olardyń qatarynda onkologııany emdeýge arnalǵan radıofarmpreparattar óndirisi de bar. Elimizde óndiristik bazanyń bolýyna qaramastan, onkologııany emdeý úshin Qazaqstan bir ǵana preparatty qoldanady. Basqa elderde óz óndirisi joq bolsa da, mundaı preparattardyń 10-nan astamy qoldanylady.
«Bizde óndiris bazasy, kadrlar, emdelýge muqtaj patsıentter bar. Biraq bıýrokratııalyq kedergiler, salaaralyq ózara is-qımyldyń bolmaýy onkologııany emdeý úshin ózimizde radıofarmpreparattardy qarqyndy óndirýge múmkindik bermeıdi. Radıofarmpreparattardy Almatydan barlyq ıadrolyq ortalyqtarǵa áýe kóligimen tasymaldaý máselesi de sheshilgen joq. Bul ásirese elimizdiń geografııasyn eskere kelgende asa mańyzdy. Mamandardyń jumys toby quryldy, olar ıadrolyq medıtsına tehnologııasynyń qajet ekenine taldaý júrgizdi jáne qoldanystaǵy zańnamaǵa ózgerister men tolyqtyrýlar engizý úshin normatıvtik-quqyqtyq qujattardyń tizbesin ázirledi», - dep atap ótti senator.
Depýtat osyǵan baılanysty Úkimet basshysynan Álıhan Smaıylovtan ıadrolyq medıtsına salasyndaǵy problemalarǵa nazar aýdarýdy, sondaı-aq olardy sheshýge járdemdesýdi surady.
