Senator dárigerler mártebesi týraly zań qabyldaýdy usyndy
NUR-SULTAN. QazAqparat - Parlament Senatynyń jalpy otyrysynda depýtat Murat Baqtııaruly elimizdiń Premer-Mınıstri Asqar Mamınniń atyna medıtsına salasyndaǵy ózekti máseleler jáne ony damytý týraly depýtattyq saýal joldady, dep habarlaıdy QazAqparat tilshisi.
Senator óńirlerge sapary kezinde jergilikti jerdegi densaýlyq saqtaý salasynda sheshimin tappaı jatqan birqatar kúrdeli máselelerdiń bar ekenine kóz jetkizgenin aıtty. Sondaı-aq, ol otandyq medıtsına naryǵy aýyr synaqqa tótep bere almaǵanyn tilge tıek etti.
«Qanshama qabyldanǵan sharalarǵa qaramastan Densaýlyq saqtaý mınıstrligi halyq densaýlyǵyn qorǵaýdy damytýdyń júıeli jolyn taba almaǵany túsiniksiz», – dedi M.Baqtııaruly.
Depýtattyq saýal barysynda keleshekte indet kezeńinde oryn alǵan jaǵdaıdan qorytyndy shyǵaryp, sala mamandarynyń pikirleri men usynystaryn eskerý kerek ekeni de aıtyldy.
Sonymen qatar medıtsına salasyndaǵy maman tapshylyǵy da nazardan tys qalmady.
«Qazir emdeý oryndarynda 4 myń dáriger jetispeıdi. Tipti, koronavırýstyń qaýpi seıilmeı turǵan iri ortalyqtar men óńirlerdegi aýrýhanalar men emhanalarda 800-den astam ınfektsıonıstiń orny bos tur», – dedi senator.
Depýtattyń aıtýynsha, qazirgi tańda dáriger kadrlarymen qamtamasyz etý qalalyq jerde – 56,8 paıyz bolsa, aýylda bul kórsetkish 16,1 paıyzdy quraıdy. Qazaqstanda medıtsına mamandaryn daıarlaıtyn alty joǵary oqý orny bar. Ondaǵy salalyq mamandar daıarlaıtyn medıtsınalyq-profılaktıkalyq fakýltetter jabylyp qalǵan. Fakýltet jabylǵanymen, mamandardyń qajettigin ómir kórsetip otyr.
«Ult densaýlyǵy – myqty memleket kepili. Sondyqtan adam densaýlyǵy úshin aıanbaı eńbek etip, ajalǵa arasha túsetin dárigerler qaýymyna arnap, «Dárigerler mártebesi týraly» zań qabyldaýdy usynamyz», – dedi M.Baqtııaruly.
