Senator «tsıfrlyq aýtızm» týraly: Qolyna smartfon ustap týǵan býyn ómirge keldi
«Ǵalymdardyń aıtýynsha, aýtızm – «HH ǵasyrdyń obasy». Al tsıfrlyq aýtızm – HHІ ǵasyrdyń derti. Qazir búkil álemde, onyń ishinde Qazaqstanda da «tsıfrlyq aýtızm» belgileri baıqala bastaǵanyn atap ótti. Balalar smartfondy uzaq ustaýy saldarynan este saqtaý, kórý jáne sóıleý qabiletinen aıyrylyp jatyr. Olardyń óz betinshe oılaýy, uzaq mátinderdi qabyldaýy, aınalaǵa nazar aýdarýy qıynǵa soǵyp otyr», - dedi N. Júsip Senattyń jalpy otyrysynda Úkimet basshysynyń orynbasary Altaı Kólginovtiń atyna joldaǵan saýalynda.
Osy oraıda ol elimizde tili kesh shyǵatyn balalar kóbeıip bara jatqanyn aıtty.
«Jeti atasyn jatqa biletin urpaq ornyna jeti aýyz sózdi ázer aıtatyn tolqyn paıda boldy. Skrıneıdjer, zýmmer, nemese Z – urpaq – óz ómirin elektrondy qurylǵysyz elesetete almaıtyn jańa býyn. Ata-analardyń 65 paıyzy balalaryna 3-5 jastan gadjet ustatady. Bir sózben aıtqanda, qolyna «smartfon ustap týǵan» býyn ómirge keldi», - dedi depýtat.
Senator gadjetızatsııa men zamanaýı tehnologııaǵa qarsy turý da durys emes ekenin aıtty. Depýtat osyǵan baılanysty mektepter men balabaqshalardaǵy ata-analar komıtetterine, sondaı-aq salalyq úkimettik emes uıymdarǵa kıbermanııanyń zııany týraly belsendi túrde aıtyp berýin usyndy.
N. Júsip óskeleń urpaqtyń densaýlyǵyna baqylaý júrgizýge tikeleı baılanysty usynystaryn da ortaǵa saldy.
«Úkimetke jańa týǵan nárestelerdi jappaı retınopatııa jáne aýdıologııalyq skrınıngten ótkizýdiń sapasyna mán berýdi, Almaty qalasyndaǵy A.Ostrovskıı atyndaǵy zaǵıp jáne kózi nashar kóretin balalarǵa arnalǵan №4-shi mektep-ınternatqa qosymsha ǵımarat salýdy usynamyz. Sonymen qatar, logoped jáne oftalmolog mamandyqtaryna bólinetin memlekettik grant sanyn kóbeıtken mańyzdy», - dedi Nurtóre Júsip.
