Senator: brakonerlik derekteri kóbeıip barady

ASTANA. KAZINFORM –  Senator Andreı Lýkın óziniń depýtattyq saýalynda sý bıoresýrstaryn qorǵaý jáne paıdalaný salasyndaǵy júıeli máselelerdi kóterdi.

Onyń aıtýynsha, sý aıdyndarynyń edáýir bóligi áli de ıesiz jatyr, birqatar óńirde sý nysandarynyń ózekti tizimi joq, al ýákiletti organdar tarapynan baqylaý óte tómen. Osynyń saldarynan brakonerlik derekter jıilep, resmı statıstıka men tekserý málimetteri sáıkes kelmeı jatyr, sondaı-aq balyq túrleriniń qory azaıyp barady.

Budan bólek, saýalda ónimdi belgilengen kvotadan tys eksporttaý, zańsyz aýlanǵan balyqty akvaósirý ónimi retinde zańdastyrý, qujattardy qoldan jasaý jáne qaıtalap paıdalaný jaǵdaılary atap ótildi. Munymen qosa, bıýdjet qarajatynyń tıimsiz ıgerilýi men salalyq baǵdarlamalardyń oryndalýyndaǵy kedergiler de sóz boldy.

- Komıtettiń 2022-2025 jyldardaǵy resmı derekteri boıynsha 84 myń tonna balyq zańsyz aınalymnan tárkilendi. Ǵylymı zertteýlerdiń nátıjeleri balyq túrleri qorlarynyń turaqty túrde tómendep bara jatqanyn kórsetti. Birqatar aımaqtarda brakonerlik áreketten kelgen zalal aıtarlyqtaı mólsherge jetip jatyr, - dedi Andreı Lýkın Senattyń jalpy otyrysynda.

Osyǵan baılanysty senator sý aıdyndaryn tolyqtaı jaýapty tulǵalarǵa bekitip berýdi, baqylaýdy kúsheıtip, monıtorıngtiń tsıfrlyq quraldaryn engizýdi usyndy. Atap aıtqanda, «E-Fish» júıesin tolyqqandy iske qosýdy, sondaı-aq brakonerlik pen qujatty qoldan jasaǵany úshin jaýapkershilikti qatańdatýdy surady.

Sonymen qatar eksportty naqty aýlanǵan balyq kólemine qatań sáıkestendire otyryp shekteý, sýbsıdııalaýdyń ashyqtyǵyn arttyrý jáne memlekettik qoldaý tásilderin qaıta qaraý usynyldy.

Aıta keteıik, Atyraýda ótken jyly brakonerlerge 31,7 mln teńge aıyppul salyndy.