Senator brakonerlerdiń kóligin tárkilep ınspektorlarǵa berýdi usyndy
ASTANA. QazAqparat - Parlament Senatynyń jalpy otyrysynda depýtat Muhtar Jumaǵazıev brakonerler kólikterin tárkilep, olardy tabıǵat qorǵaý ınspektorlaryna berýdi usyndy, dep habarlaıdy QazAqparat.
«Qańtar aıynda Qaraǵandy oblysynyń Nura aýdanynda «Ohotzooprom» BP» respýblıkalyq memlekettik qazynalyq kásipornynyń ınspektory Erlan Nurǵalıevtyń qyzmet babynda brakonerlerdiń qolynan qaza taýyp, ınspektor Petr Nıtsyktyń aýyr jaraqat alýy jurtshylyqtyń narazylyǵyn jáne ashý-yzasyn týǵyzdy. Bul oqıǵa QR Parlament depýtattarynyń arasynda da úlken talqyǵa tústi. Parlament Senatynyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń músheleri qandy oqıǵanyń oryn alý sebebin jan-jaqty taldaı otyryp, mynadaı qorytyndyǵa keldi: birinshi, elimizde janýarlar dúnıesin qorǵaý salasynda qordalanǵan túıindi máselelerdi sheshý jolynda batyl qadamdar jasaý. Sonyń ishinde Qazaqstan Respýblıkasynyń Aýyl sharýashylyǵy mınıstrliginen osy oraıdaǵy ýákilettikterin tolyqqandy atqarýyn talap etý», - dep toqtaldy senator Úkimet basshysy Baqytjan Saǵyntaevtyń atyna joldaǵan depýtattyq saýalynda.
Ekinshiden, memleket aýmaǵynda sırek kezdesetin jáne joǵalyp ketý qaýpi bar ań-qus túrlerin saqtaý jáne olardyń sanyn kóbeıtý úshin qoldanystaǵy tıisti zańnamalyq aktilerge ózgerister men tolyqtyrýlar engizý qajettigi aıtyldy.
«Búgingi tańda janýarlar dúnıesin qorǵaıtyn ókiletti organdardyń materıaldyq-tehnıkalyq jaǵdaıy eshqandaı syn kótermeıdi. Onyń ústine eldiń shetinde, jeldiń ótinde júrgen ınspektordyń ortasha aılyq eńbekaqysy shamamen 60-70 myń teńge. Árbir ınspektorǵa shaqqanda júkteme 2 ese artyq. Osynyń saldarynan qarý men baılanys quraldarynyń jańa úlgilerimen jaraqtanǵan brakonerler aldynda ósimdikter men janýarlar dúnıesin qorǵaıtyn saqshylarymyz materıaldyq jáne tehnıkalyq jaǵynan dármensiz», - dedi Muhtar Jumaǵazıev.
Onyń sózinshe, sońǵy úsh-tórt jyl ishinde 3 myńǵa jýyq kıik atylsa, tabıǵı ortaǵa 3,5 mıllıard teńge zııan keltirildi. 800-den astam kúdikti adam ınspektorlardyń qolyna túsken bolsa, brakonerlerge qatysty istiń jartysynan astamy dáıekti aıǵaqtar joq degen jeleýmen sot otyrystaryna jetpeı, qysqartylǵan.
«Brakonerlik qylmys dalalyq jolda júrýge qolaıly ári júrdek kólikterdiń kómegimen júzege asyrylady. Zań talaptary boıynsha ol kólikter qylmys quraly bolyp esepteletindikten memleket paıdasyna tárkilenýi qajet. Alaıda, qorshaǵan ortaǵa, tabıǵat ıgiligine esepsiz shyǵyn keltirgen brakonerdiń basym kópshiligi jeńil jaza alýmen shektelip, kólik quraldary keıin qaıtarylyp beriledi. Eger olardy kólikterge ıelik quqyǵynan aıyryp, qylmysqa qatysty kólikter men basqa da quraldar eshqandaı ymyrasyz tárkilense, brakonerlerlik qylmysqa birden-bir tosqaýyl qoıylar edi», - dedi senator.
Osy oraıda, ol brakonerlik áreketterge qoldanylǵan kólikterdi sot sheshimi boıynsha memleket paıdasyna tárkilep, olardy janýarlar dúnıesin qorǵaıtyn organdar quzyryna ótkizýdi usyndy.
Eske salsaq, 5 kıik atqan brakonerlermen qaqtyǵysta aýyr jaraqat alǵan «Ohotzooprom» ÓB» RMQK ınspektory Erlan Nurǵalıev 15 qańtarda Astananyń №1 aýrýhanasynda kóz jumǵan edi.
QR Іshki ister mınıstri Qalmuhanbet Qasymov jaraqat alǵan «Ohotzooprom» ınspektoryn qutqarýǵa nelikten kóp ýaqyt ketkenin túsindirdi.
Sondaı-aq, osy oqıǵaǵa QR Aqparat jáne kommýnıkatsııalar mınıstri Dáýren Abaev pikir bildirdi.
