Senator bıznes pen ǵylymǵa qatysty qandaı kúdigi bolǵanyn aıtty

ASTANA. QazAqparat - Qazaqstandaǵy ǵylymnyń taǵdyryn bıznes sheshedi. Bul týraly búgin Astanada tehnologııany kommertsııalandyrý taqyrybyna arnalǵan halyqaralyq forýmda Senat depýtaty Baqytjan Jumaǵulov málim etti, dep habarlaıdy QazAqparat.

«Bizdiń ǵylymnyń taǵdyryna bıznes eleýli túrde yqpal etedi, ıaǵnı bul asyra aıtqandyq emes. Innovatsııalarǵa bıznestiń suranysy bolsa, ǵylymnyń damý joly da aıqyndalady. Eger de ǵylym salasyna kásipkerlerdiń qyzyǵýshylyǵy baıqalmasa, onda sol jaıbasarlyq qalypta ǵana ilgeri júremiz», - dedi senator.

Osy oraıda ol Elbasy Joldaýy aıasynda naqty sektor tarapynan jańa tehnologııalarǵa suranysty yntalandyrý maqsaty júktelgenin eske salyp ótti.

«Bul baǵytta tıisti sheshimder jasaý úshin zań shyǵarýshylyq turǵysynda tyǵyz qarym-qatynasta jumys isteýge ázirmiz, ıaǵnı Parlament Májilisi de, Senaty da óz tarapynan qoldaý jasaýǵa daıyn», - dedi B. Jumaǵulov.

Onyń paıymdaýynsha, Qazaqstan úshin naqty ǵylymı jobalardy bıznes tarapynan birlesip qarjylandyrýdy engizý qaǵıdatty qadam boldy.

«Osyǵan deıin mundaı bolmaǵan edi. Bıznestiń qarjysy ǵylymǵa baǵyttala bastady. Shynyn aıtsam, bıznes óz qarjysyn ǵylymǵa salatynyna senbegen edim. Búginde jeke bıznes jaǵynan birlesip qarjylandyrý úlesi 13 paıyzǵa jetti», - dedi depýtat.

Budan buryn habarlanǵandaı, jaqynda Senatta ótken «dóńgelek ústel» otyrysynda QR Bilim jáne ǵylym vıtse-mınıstri Ashat Aımaǵambetov Qazaqstanda otandyq ǵalymdardyń jobalaryna jeke sektordyń ınvestıtsııasy úsh esege artqanyn málimdegen bolatyn.