Senator: Baıqońyrdaǵy qazaqstandyqtar talapqa saı bilim ala almaı otyr
«Baıqońyr qalasynda qazir 77 myńnan asa halyq turatyn bolsa, onyń 70%-y qazaqstandyqtar bolyp sanalady. Baıqońyr halqynyń eń basty máselesi – qazaqstandyq standartpen bilim beretin balabaqshalar men mektepterdiń tapshylyǵy bolyp otyr. 2015 jyly QR men RF úkimetaralyq komıssııasynyń sheshimimen Reseıge qarasty 5 mektep pen 1 balabaqsha Qazaqstannyń qaramaǵyna alynyp, balalarǵa qazaqstandyq standartpen qazaq tilinde bilim alýǵa múmkindik jasaldy. Osy jly memlekettik-jekemenshik áriptestik boıynsha qosymsha 2 balabaqsha ashylyp, qyzmet kórsetýde. Qazaq tilinde tálim beretin balabaqshalardyń búgingi jaǵdaıy alańdatyp otyr. Bul balabaqshalarda ana tilinde bilim berý jáne tolyqqandy mektepaldy daıarlyqty ótkizýde kemshilikter bar», - dedi Murat Baqtııaruly.
Depýtattyń aıtýynsha, ata-analary óz balalarynyń qazaq mektepterinde bilim alýy úshin tolyqqandy mektepaldy daıarlyqtan ótýleri qanaǵattandyrmaı keledi. Senator óz saýalynda birneshe derekterdi alǵa tartty. Mysaly, qazaq tilinde bilim beretin Baıqońyr qalasyndaǵy 5 mektepte búgingi kúni 5 236, al reseılik 7 mektepte 4049 bala bilim alady. Onyń 1 508-i, ıaǵnı 37%-y Qazaqstan azamattarynyń balalary. Baıqońyrda qazir Reseı Federatsııasyna qarasty 7 mektep bar. Depýtat olardyń syıymdylyǵy tolyq qamtylmaǵan deıdi. Murat Baqtııarulynyń aıtýynsha, qala turǵyndarymen kezdesý barysynda orys tilinde oqytatyn qazaqstandyq mektepke suranystyń joǵary ekenin eskere otyryp, osy 7 mekteptiń birin memleket menshigine ótkizýdi surap otyr eken.⠀
«Bul jaǵdaı, reseılik mektepte oqıtyn balalardyń mektep bitirgennen soń UBT-ǵa qatysýyna jáne qazaqstandyq joǵary oqý oryndaryna túsýine kóp kedergi keltirýde. Sebebi emtıhannyń mindetti pánderi – Qazaqstan tarıhy, qazaq tili, qazaq ádebıeti ol mektepterde oqytylmaıdy», - dedi senator.
Odan bólek, Baıqońyrdyń ortalyq aýdandarynda Reseı Federatsııasynyń menshigindegi, syıymdylyǵy tolyq paıdalanylmaı turǵan 13 balabaqsha bar. Depýtat halyqtyń birneshe balabaqshany memlekettik ıýrısdıktsııaǵa ótkizý talaby oryndy dep sanaıdy.
«Olar Qazaqstan aýmaǵynda týyp-óskenimen, óz jerinde turyp, meniń Otanym – Rossııa, meniń astanam – Moskva dep, Rossııanyń arǵy-bergi tarıhyn, tili men ádebıetin oqyp, árıne reseılik patrıotızm rýhynda tárbıelenedi. Aıta ótýimiz kerek, biz jerimizdi jalǵa bergenimizben, sol jerde turyp jatqan halqymyzdy jalǵa bergen joqpyz ǵoı», - dedi Murat Baqtııaruly.
Senator Úkimet basshysynan Baıqońyr qalasy turǵyndarynyń bilim berý salasyna qatysty osy túıtkildi máselesin basty nazarǵa alyp, oń sheshilýine yqpal etýin surady.
