Senator «Baıqońyr» ǵarysh aılaǵynan zymyrandardy kóktemde ushyrmaýdy surady
Aıta keteıik, búgin jalpy otyrysta «2004 jylǵy 22 jeltoqsandaǵy QR Úkimeti men RF Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Zańy qabyldandy.
«Búgingi talqyǵa túsip otyrǵan Zań jobasy bizdiń komıtette de jan-jaqty qyzý talqylandy. Bul hattama jobasynyń erejeleri qabyldanǵan jaǵdaıda Baıqońyr ǵarysh aılaǵynda «Báıterek» ǵarysh zymyrany keshenin birlesip paıdalaný máseleleri boıynsha Qazaqstan – Reseı yntymaqtastyǵy barysynda týyndaıtyn quqyqtyq qatynastardy retteıtin bolady. Ásirese, kópten beri sheshimin tappaı kele jatqan Reseı tarapynyń menshigindegi jáne Baıqońyr kesheniniń obektilerinde ornalasqan múlikti qabyldaý-tapsyrý úshin uıymdyq-quqyqtyq máseleler sheshimin tabady dep oılaımyz. Báıterek ǵarysh zymyran keshenin qurý orbıtalyq spýtnıktik júıelerdi jańartý jáne qalyptastyrý jónindegi múmkindikterdi keńeıtýge múmkindik beretin aýqymdy Qazaqstan – Reseı jobasy dep aıtýǵa bolady. Sondyqtan da Zań jobasyn qoldaımyn», - dep toqtaldy M. Baqtııaruly.
Sonymen birge senator 80 myńǵa jýyq halyq turatyn Baıqońyr qalasynyń turǵyndary jáne saılaýshylarymen kezdesý barysynda olardyń talap-ótinishteri boıynsha uzaq jyldar boıy áli de bolsa sheshimin tappaı kele jatqan máselelerge nazar aýdardy.
«Birinshiden, árbir zymyran usha salysymen keminde tórt-bes kún boıy aýa raıy buzylyp, qatty jel turady. Ol jel ońtústúgi Jańaqorǵan, soltústigi Araldan asyp Yrǵyzǵa deıin barady. Kóktem aılarynda ylǵaldy bolǵan jerlerde jaqsy shyqqan shópti jáne jerdi osy úzdiksiz soqqan jel keptirip jiberedi. Bul mal men egin sharýashylyǵyna zardabyn tıgizip jatqan qalypty qubylysqa aınaldy. Sondyqtan da bizdiń saılaýshylarymyz múmkindik bolǵansha Baıqońyr ǵarysh aılaǵynan ushatyn zymyrandardy kóktem aılarynda ushyrmaýdy suraıdy», - dedi depýtat.
M. Baqtııaruly Baıqońyr qalasy men ǵarysh kesheni Reseıge uzaq jyldarǵa jalǵa berilgenin aıta kele, osy úshin jylyna Qazaqstan bıýdjetine 115 mln dollar kóleminde qarjy túsetinine toqtaldy.
Senatordyń aıtýynsha, sońǵy 15-20 jyldyń ishinde osy aımaqtaǵy turǵyndar arasynda qan-tamyrlary aýrýlary kóbeıgen. Buǵan kezinde asa ýly otyn geptılmen ushatyn Proton zymyrandarynda bolǵan apattardyń úlken áseri boldy.
«Jalǵa berýden túsetin qarjynyń bir bóligi jergilikti turǵyndardyń emdeý-saýyqtyrý oryndarynda densaýlyǵyn jóndeýge berilip otyrý kerek dep esepteımiz», - dedi Murat Baqtııaruly.
