Senator Batys Qazaqstan oblysyndaǵy sý tapshylyǵyna alańdaýshylyq bildirdi

NUR-SULTAN. QazAqparat - Senator Narıman Tóreǵalıev elimizdiń Premer-Mınıstrine joldaǵan depýtattyq saýalynda Batys Qazaqstan oblysynyń ońtústigindegi 4 aýdannyń, onyń ishinde Bókeı ordasy, Jánibek, Qaztalov, Jańaqala aýdandarynyń turǵyndary tap bolyp otyrǵan ózekti máseleni kóterdi, dep habarlaıdy QazAqparat tilshisi.

Onyń aıtýynsha, qazirgi ýaqytta aımaqta sýmen jabdyqtaý máselesi asa mańyzdy bolyp otyr. Bul óńir negizinen mal sharýashylyǵymen aınalysady jáne Reseıden sý alýda. Búgingi tańda Edil ózeninen Reseıdiń Saratov, Volgograd oblystary arqyly oblystyń ońtústik aımaqtaryna aǵyp keletin sý mólsheri aıtarlyqtaı azaıdy. Sonymen qatar, jyl saıyn sý alý shyǵyndary ósip keledi.

Batysqazaqstandyqtardyń naqty muqtajdaryna qosymsha 131 mln tekshe metr sý qajet.

Oblys aldynda turǵan negizgi mindetterdiń biri mal basyn kóbeıtý, ony óńdeý jáne eksporttaý bolyp tabylady. Sý tapshylyǵy bul maqsatty júzege asyrýǵa aıtarlyqtaı kedergi keltirip keledi.

«Sońǵy jyldary sharýa qojalyqtary memlekettik baǵdarlamalardyń kómegimen shetelden asyl tuqymdy mal satyp alýda. Biraq qazirgi problemalardyń kesirinen barlyq maldan aıyrylyp qalý qaýpi bar», - deıdi senator.

Narıman Tóreǵalıev qarjylandyrý máselesin de qozǵady. Depýtattyń sózine qaraǵanda, ótken jyly 2021-2023 jyldarǵa arnalǵan respýblıkalyq bıýdjetti bekitý kezinde batys óńiriniń turǵyndaryna sý jetkizý shyǵyndaryn óteý máselesi qoldaý tappady.

Senator óz saýalynda Úkimet basshysynan bıylǵy jyldyń aqpan-naýryz aılarynda bıýdjetti naqtylaý kezinde 131 mln m3 kóleminde sý jetkizý jónindegi shyǵystarǵa qosymsha 3,5 mlrd teńge bólýdi surady. Bul Batys Qazaqstan oblysynda mal sharýashylyǵyn damytýǵa múmkindik beretin qarjy kólemi.