Senator balalaryn shoý-bızneske tartqan ata-analarǵa qarsy shyqty

NUR-SULTAN. QazAqparat - Senat depýtaty, elimizdegi Bala quqyqtary jónindegi ýákil Sáýle Aıtpaeva bala eńbegin jeke maqsatyna paıdalanatyndarǵa qatysty jaýapkershilikti kúsheıtý usynysyn jasady. Osy oraıda ol Úkimet basshysy Asqar Mamın men Bas prokýror Ǵızat Nurdáýletovtiń atyna tıisti depýtattyq saýal joldady, dep habarlaıdy QazAqparat tilshisi.

Onyń atap ótýinshe, bala eńbegin úı jaǵdaıynda paıdalaný men úı sharýasyn júrgizý quqyqtyq tártipte rettelmegen. Kámeletke tolmaǵandarmen jáne mekteppen kelisim jasaý tártibi erekshe qadamdy qajet etedi, sondaı-aq jumys pen oqýdy qıystyryp alyp júrýge qatysty normalardy qaıta qaraý qajet.

«Ata-analar tarapynan balanyń ańqaýlyǵyn paıdalanýy aıryqsha ózekti bolyp otyr. Olar balalaryn jeke ambıtsııalaryna jetý resýrsy retinde paıdalanady. ıAǵnı bala eńbegin sportta, jarnama jáne modeldik bızneste, shoý-bızneste qamtıdy», - dedi senator.

Osy oraıda túrli shoý-bıznes pen modeldik bıznestegi tártip pen zańdylyqtary balanyń densaýlyǵyna nuqsan keltiredi. Sonymen qatar osyndaı qosymsha mindetterdiń saldarynan jetkinshekter oqý úlgeriminen aqsaıdy.

Bala quqyqtary jónindegi ýákildiń paıymynsha, ata-analar balasynyń syrt-kelbetin paıda tabý maqsatynda paıdalanbaýy kerek. Bul turǵyda jetkinshekter men jasóspirimder túrli táýekelderge tap bolýy múmkin.

Bul rette senator kásipkerler zańnamany óz maqsatynda paıdalanbaýy úshin, Eńbek kodeksinde 14 jastaǵy jasóspirim nemen jáne qandaı jaǵdaıda aınalysa alatyndyǵynyń naqty tizbesin belgileýdi usyndy.

S. Aıtpaevanyń aıtýynsha, jyl saıyn jumys isteýge nıettiler úshin mamandyqqa daıyndyqty uıymdastyryp, balalar kásipteriniń tizimin pysyqtaý kerek. Sonymen qatar balalardyń eńbek bırjasyn uıymdastyryp, eńbekaqynyń mólsherin aldyn ala jarııa etý qajet.

«Jeke materıaldyq problemalary men múddelerin sheshý maqsatynda balalar eńbegin paıdalanǵany úshin ata-analar jaýapkershiligin kúsheıtý kerek», - dedi depýtat.