Senator balalardy zııandy tamaq ónimderiniń jarnamasynan qorǵaýdy surady
«Qazaqstandaǵy balalar maıly, qanty men tuzy kóp ónimderdiń kólemdi marketınginiń yqpalynda qalǵanyn moıyndaý kerek. Bul bizdiń balalardy aýqymdy marketıng áserinen qorǵaý jáne shekteý qajettigin kórsetedi», - dedi depýtat Senattyń jalpy otyrysynda jarııalaǵan depýtattyq saýalynda.
Qazaqstandyq ulttyq qoǵamdyq densaýlyq saqtaý ortalyǵynyń zertteýshileri monıtorıng júrgizip, memlekettik teledıdardaǵy tamaq ónimderi jarnamasynyń aýqymy men sıpatyna baǵa berdi. Alty ulttyq telearnadaǵy, onyń ishinde balalar arnasynan 10 myńnan astam jarnama qaralyp, shamamen 370 saǵat efır ýaqytyn quraıtyny anyqtaldy. Senator zııandy tamaq ónimderi men alkogolsiz sýsyndardyń marketıngi balalardyń shamadan tys tolysýynyń kóbeıip ketýine tikeleı baılanysty dep sanaıdy.
«Ortasha alǵanda, 8-10 jas aralyǵyndaǵy balalardyń 25,7 paıyzy teledıdar kórýge eki nemese odan da kóp saǵat ýaqyty ketedi jáne kúnine shamamen 13 tamaq jarnamasyn, al jylyna 4 700 jarnama kóredi. Teledıdardaǵy barlyq jarnamanyń 32,8 paıyzy azyq-túlik ónimderiniń jarnamasy. Eń jıi jarnamalanatyn taǵam ónimderiniń qatarynda quramynda qanty bar sýsyndar tur, olardyń mólsheri 22 % bolsa, shokolad pen energetıkalyq batondarǵa qatysty 17 paıyz boldy», - dedi Aqmaral Álnazarova.
Senator elimizdiń zańnamalyq aktilerine zııandy tamaq ónimderiniń marketıngin shekteıtin jáne retteıtin, durys tamaqtaný týraly aqparatty barlyq BAQ-ta , sonyń ishinde ınternette tolyq kólemde alýǵa quqyq beretin tıisti ózgerister men tolyqtyrýlar engizý múmkindigin qaraýdy surady.
Foto: aqmeshit-aptalygy.kz