Senator: Balalardy zorlyq-zombylyqtan qorǵaý – Úkimet pen Parlamenttiń mańyzdy mindetteriniń biri
ASTANA. KAZINFORM – Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń depýtattary «Kámeletke tolmaǵandardyń qaýipsizdigin jáne quqyqtaryn qorǵaýdy qamtamasyz etýdiń ózekti máseleleri: problemalar jáne olardy sheshý joldary» taqyryby boıynsha dóńgelek ústel otyrysyn ótkizdi. Bul týraly Senattyń baspasóz qyzmeti málimdedi.
Komıtet tóraǵasy Nurlan Beknazarov óz sózinde Memleket basshysynyń Joldaýynda balalardyń qaýipsizdigi men quqyqtaryn qorǵaý, olardyń áleýmettik jáne ekonomıkalyq ál-aýqatyn qamtamasyz etý máselesine erekshe nazar aýdarylǵanyn jáne kámeletke tolmaǵandarǵa qatysty zorlyq-zombylyqtyń kez kelgen túrine jazany qatańdatý kerektigin atap ótkenin eske saldy.
«Balalardy zorlyq-zombylyq pen qatygezdikten qorǵaý, olarǵa qarsy qylmystardyń aldyn alý, quqyqtaryn qorǵaý úshin jaǵdaı jasaý – Úkimet pen Parlamenttiń mańyzdy mindetteriniń biri. Balalardyń qaýipsizdigin qamtamasyz etý kóbinese bilim deńgeıin, mádenıetin, adamgershilik qasıetin, otbasy ınstıtýtynyń rólin arttyrý, qolaıly áleýmettik-ekonomıkalyq jaǵdaı jasaý sııaqty kóptegen máselelerdi keshendi sheshýge baılanysty. Munyń bári krımınogendilik deńgeıiniń tómendeýine jáne tıisinshe balalarǵa qatysty qylmystardyń sanyna yqpal etetin bolady», - dedi senator.
Otyrys barysynda ІІM Ákimshilik polıtsııa komıtetiniń tóraǵasy Qaısar Sultanbek kámeletke tolmaǵandardyń qaýipsizdigin qamtamasyz etý jóninde qabyldanyp jatqan sharalar týraly baıandama jasady. Ol qazirgi ýaqytta áıelder quqyqtary men balalardyń qaýipsizdigin qamtamasyz etý týraly zań Parlamenttiń qaraýynda jatqanyn aıta kelip, onda osy adamdarǵa qatysty zorlyq-zombylyqtyń aldyn alý jónindegi sharalar kesheni jáne ómirde qıyn jaǵdaıǵa tap bolǵan adamdarǵa áleýmettik kómek kórsetý týraly erejeler bar ekenin habarlady.
Otyrysta sonymen qatar Astana jáne Shymkent qalalary, Batys Qazaqstan oblysy máslıhattarynyń, sondaı-aq Bas prokýratýranyń, ádilet, oqý-aǵartý, eńbek jáne áleýmettik qorǵaý, mádenıet jáne aqparat mınıstrlikteriniń ókilderi jáne basqalar kámeletke tolmaǵandardyń quqyqtaryn qorǵaý salasyndaǵy zańnamany jaqsartý jóninde baıandama oqyp, usynystaryn aıtty.
