Senator B. Beknazarov mınıstrlerdiń Parlamenttegi jaýabyn baǵalap otyrýdy usyndy
ASTANA. QazAqparat - Búgin Senatta QR Úkimetiniń jáne Respýblıkalyq bıýdjettiń atqarylýyn baqylaý jónindegi esep komıtetiniń 2014 jylǵy respýblıkalyq bıýdjettiń atqarylýy týraly esebin talqylaý barysynda senator Bektas Beknazarov mınıstrlerdiń Parlamenttegi jaýaptaryn baǵalap otyrý máselesin kóterdi.
«Bir máselege nazar aýdarǵandy paryz sanaımyn, bul bizdegi «suraq-jaýap» protsedýrasy. Parlamentte mınıstrlerdiń aldynda naqty-naqty suraqtar qoıylady. Naqty suraqqa naqty jaýap estigimiz keledi. Alaıda, búgin ǵana emes, jalpylama alǵanda mynadaı minberden berilgen jaýaptar kóńilden shyǵa bermeıdi. Biz kabınetke baryp emes, máselelerdi osyndaı jerlerde aıtýǵa tıispiz. Eger naqty jaýap almaıtyn bolsaq, jalań sózben shyǵaryp salý jalǵasa beretin bolsa, onda Parlamenttegi «suraq-jaýap» protsedýrasynyń qajeti qansha?» - degen depýtat palata spıkerine de usynysyn jetkizdi.
«Bizde tehnıkalyq múmkindik bar. Árbir joly laýazym ıesi jaýap bergende sonyń jaýabyn «qabyldaımyz ba, joq pa?» «qanaǵattandyra ma, joq pa?» soǵan baǵa berip otyrý kerek sekildi. Túımeshek arqyly soǵan daýys berip, sol ekranda kórinip tursyn. Bul birinshiden laýazym ıeleriniń mundaı otyrystarǵa daıyndyǵyn ǵana emes, depýtattardyń da jaýapkershiligin kúsheıtetin edi. Endeshe, aldaǵy ýaqytta osyny eskereıik. Jaýap beretin laýazymdy tulǵalardyń jaýapkershiligin arttyratyn tetikti qosý kerek dep esepteımin», - dedi senator B. Beknazarov.
