Senator áıelderge arnalǵan bilim berý ortalyqtaryn qoldaýǵa shaqyrdy

ASTANA. KAZINFORM – Senator Nurtóre Júsip Úkimetke joldaǵan depýtattyq saýalynda áıelderge arnalǵan bilim, aqparattyq-konsýltatsııa berý ortalyqtaryn qoldaýǵa shaqyrdy.

«Statıstıkalyq derekterge sáıkes, elimizde jumyssyzdar sany 452 myń adamdy qurasa, onyń arasynda jumyssyz áıelder 242 myń shamasynda. Bul derek Úkimetti oılandyra ma?», - dedi N. Júsip.

Depýtattyń aıtýynsha, elordada 2021 jyldan bastap kópbalaly jáne jalǵyzbasty analarǵa, ómirde qıyn jaǵdaıda tap bolǵan, sondaı-aq múgedek balalardy tárbıelep otyrǵan analarǵa kómek kórsetetin «Baqytty otbasy» ortalyǵy jumys isteıdi. Bul ortalyq qazirgi kezde túrli kásip boıynsha 20-dan astam bilim berý kýrsyn uıymdastyryp, onda 2,5 myń áıel bilim alǵan. Onyń ústine, olardyń 80 paıyzy óz isin ashqan jáne ortalyq zańgerleriniń qoldaýymen ótinish berip, memlekettik grant ala aldy.

«Baqytty otbasy» ortalyǵy bir jaǵynan áıelderdi rýhanı, moraldyq turǵydan qoldap, kásip úıretse, ekinshi jaǵynan halqymyzdyń etnografııalyq murasyn jańǵyrtyp, jas urpaqqa tálim beretin taptyrmas mádenı mekteptiń qyzmetin atqaryp otyr. Osyndaı úlgidegi ortalyqtardy óńirlerde, ásirese, oblys ortalyqtarynan kóptep ashýǵa qalaı qaraısyz? Úkimet tarapynan arnaıy granttyq kómek berýge múmkindikterińiz bar ma? Osy úlgidegi ortalyqtardyń ónimderin naryqqa shyǵarýǵa, qorǵanys, medıtsına, mádenıet salalary boıynsha júıeli tapsyrystar arqyly qalyptastyrýǵa múmkindik bola ma?»,- dep surady Nurtóre Júsip Premer-Mınıstr Oljas Bektenovtyń atyna joldaǵan saýalynda.