Senator: Avtojoldar jóndeý salasyn quzyretti organdar tekserý kerek

ASTANA. QazAqparat – Almaty oblysy men Jetisý oblysynyń turǵyndary joldardy jóndeıtin merdiger kompanııalardyń jumysy sapasyna narazy bolyp otyr. Senator Sultan Dúısembınov óziniń Úkimet basshysy Álıhan Smaılovtyń atyna joldaǵan saýalynda osy máseleni kóterdi, dep habarlaıdy QazAqparat tilshisi.

Onyń aıtýynsha, kúrdeli jóndeý jumystary 2-3 jylǵa keshigip qaldy, tıisti deńgeıde júrgizilmedi jáne tehnıka bos tur.

Senator merdiger kompanııalardyń óz mindettemesin ýaqtyly oryndamaýy jáne sapasyz atqarýy, bilikti mamandar men qajetti tehnıkanyń jetispeýi, konkýrstardyń ótkizilýin qadaǵalaý men baqylaýdyń bolmaýy, sondaı-aq konkýrsta jeńip shyqqan merdigerlerdiń mindettemesi qosalqy merdigerge berilgeni osyǵan sebep boldy dep sanaıdy. Bul keıinnen jaýapty adamdardy izdeýdi qıyndatady.

«Jol jóndeý jumystarynyń ýaqytynda júrgizilmeýi, joldardyń paıdalanýǵa berilgen bóliginde jol jıekteriniń jasalmaýy jáne paıdalanýdaǵy joldardyń tómen sapasy jol-kólik oqıǵasy kórsetkishteriniń jyl saıyn ósýine sebep bolyp otyr. Mysaly, Jetisý oblysy Polıtsııa departamentiniń málimeti boıynsha respýblıkalyq mańyzy bar tas joldarda 2020 jyly 144 jol-kólik oqıǵasy bolyp, 48 adamnyń ómiri qıyldy, 223 adam zardap shekken. 2021 jyly 186 jol-kólik oqıǵasy tirkelip, 76 adam qaıtys boldy, 368 adam zardap shekti. Al, 2022 jyldyń 7 aıynda 105 jol-kólik oqıǵasynda 45 adam qaıtys boldy, 157 adam zardap shekti», - dedi senator S. Dúısembınov.

Osy oraıda, ol atalǵan oblystardaǵy avtomobıl joldaryn kúrdeli jóndeý boıynsha tıisti quzyretti organdarǵa tekserý júrgizýdi, jergilikti atqarýshy organdardy tarta otyryp, jol jóndeý jumystarynyń sapasyn turaqty baqylaýdyń naqty algorıtmin ázirleýdi, jol salasynyń tıisti mamandaryn daıarlaýdy jáne konkýrs ótkizý tártibin retteıtin normatıvtik-quqyqtyq aktilerdi qaıta qaraýdy usyndy.