Senator aýylǵa beriletin bilim granttaryn 50 paıyzǵa kóbeıtýdi usyndy

NUR-SULTAN. QazAqparat – Aýyldyq jerdegi orta bilim berý sapasynyń tómendiginen balalar memlekettik granttar alýǵa qaýqarsyz. Bul týraly Senat depýtaty Aqylbek Kúrishbaev málim etti, dep habarlaıdy QazAqparat tilshisi.

«Aýyldyq aımaqtardaǵy bilim berý nysandaryna qajettilik 312-ge jetti, 32 mektep - apatty jaǵdaıda, 86-sy - úsh aýysymdy. Munda 2 240 pedagog jetispeıdi, bul elimizdegi jalpy qajettiliktiń 75 paıyzyn quraıdy. Ásirese, aýyl mektepterindegi bilim berý máseleleri qatty alańdatady. PISA nátıjelerine súıensek, qala men aýyl arasyndaǵy bilim sapasynda 22-den 37 balǵa deıingi alshaqtyq bar. Ulttyq biryńǵaı test nátıjeleri boıynsha, aýyl mektepteriniń túlekteri qalalyq oqýshylarynan orta eseppen 5-6 ballǵa artta qalyp otyr. Sondyqtan da aýyldyq jerdegi orta bilim berý sapasynyń tómendiginen kóptegen daryndy balalar joǵary oqý oryndaryna memlekettik granttar alýǵa ıe bola almaıdy», - dedi depýtat Senattaǵy aýyldyq aýmaqtardy damytý jónindegi parlamenttik tyńdaýda.

Onyń aıtýynsha, aýyldarda 550 mádenı nysan, sport zaly qajet, 150-ge jýyq kitaphana jetispeıdi. Aýyldyń mádenı-sporttyq ınfraqurylymyn damytý kórsetkishteri ákimderdi baǵalaý krıterııasyna da kirmeıdi.

«Bilim berý granttaryndaǵy aýyldyq kvotany 30 paıyzdan kem degende 50 paıyzǵa deıin kóbeıtý kerek. Sonymen qatar, basqa elderdegideı, agroqurylymdardyń stýdentterdi ýnıversıtetterde oqytýǵa jumsaǵan qarajat shyǵyndaryn sýbsıdııalaý óte mańyzdy», - dedi A. Kúrishbaev.