Senator aýyldaǵy medıtsına sapasyn jaqsartý usynysyn aıtty

ASTANA. QazAqparat – Senator Sovetbek Medebaev aýyl medıtsınasy salasyndaǵy jetistikter jáne elimizdiń óńirlerinde engizilýi qajet jańa joba týraly aıtyp berdi, dep habarlaıdy QazAqparat tilshisi.

Senatordyń aıtýynsha, Jambyl oblysynyń Merki aýdandyq aýrýhanasynda aýyl turǵyndaryna zamanaýı sapaly medıtsınalyq qyzmet kórsetý boıynsha pılottyq joba oń nátıje beredi.

«Merki aýdandyq aýrýhanasy dárigerlerdiń, qarjylandyrý men dári-dármektiń, qural-jabdyqtyń jetispeýine qaramastan, uıym negizgi kórsetkishterdi jaqsartyp, jalpy halyqtyń densaýlyq saqtaý júıesine degen qarym-qatynasyn ońtaıly ózgerte bildi. Biz tek kemshilikterdi ǵana tizbektemeı, respýblıka deńgeıinde osyndaı úlgi bolarlyq jańa ári pılottyq jobalardy jaqsylap qolǵa alýymyz qajet dep esepteımin», - dedi Sovetbek Medebaev Senattyń jalpy otyrysynda Úkimet basshysy Álıhan Smaıylovtyń atyna joldaǵan saýalynda.

Depýtat «úzdik tájirıbe ortalyǵy» júıesi «Deni saý ult» árbir azamat úshin sapaly jáne qoljetimdi densaýlyq saqtaý» ulttyq jobasy aıasynda jumys istep jatqanyn atap ótti. Engizilgen jobalar medıtsınalyq qyzmet sapasyna rıza bolǵan patsıentterdiń 34% artýyna, shaǵymdar sanynyń 60% tómendeýine yqpal etken. Al «Densaýlyq mektebi» jobasy medıtsınalyq saýattylyq deńgeıin kóterdi.

«Adam aýrýlarynyń aldyn alýǵa baǵyttalǵan erekshe tásil, ıaǵnı «dıagnozǵa baǵyttalǵan tásil» naýqasty birinshi orynǵa qoıyp, eski júıeni jaqsartty. Jańadan ashylǵan «Densaýlyq mektepteri» medıtsınalyq saýattylyq deńgeıin kóterdi. Ýchaskelik dárigerlerdiń júktemesin jáne jumysyn jeńildetý maqsatynda meıirbıke qabyldaýy engizildi. Elimizde aýyldyq medıtsınany jaqsartý jáne atalǵan pılot jobalardy barlyq óńirlerge tıimdi engizý maqsatynda Jambyl oblysynda «Ulttyq demonstratıvti platforma» qurýdy jáne óńirdi alǵashqy medıtsınalyq-sanıtarııalyq kómektiń ozyq tájirıbesin engizý ári transfertteý jónindegi respýblıkalyq úılestirýshi ortalyq retinde túrde bekitýdi usynamyz», - dep atap ótti senator.