Senator aýyl turǵyndarynyń tabysyn arttyrýǵa qatysty usynys aıtty
Depýtat óz saýalynda «Jambyl oblysy turǵyndarynyń tabysyn arttyrý» qanatqaqty jobasynyń nátıjelerine toqtaldy. Joba jer telimderin paıdalanýdyń tıimdiligin, mal men qustyń ónimdiligin arttyrýǵa jáne jem-shóp pen jaıylym jaǵdaıyn jaqsartýǵa múmkindik berý úshin aýyldar mańyndaǵy jer telimderin neǵurlym utymdy paıdalanýǵa baǵyttalǵan. Joba aıasynda aýyl turǵyndarynyń kásipkerlik bastamalaryn qarjylandyrý múmkindigi de bolady.
«Joba nátıjesinde jeke kásipkerler sany 2 282-ge artyp, 589 jańa jumys oryndary ashylýy esebinen jumyssyzdar sany kemidi. Ataýly áleýmettik kómek alýshylar sany 1 058 otbasyǵa nemese 65% azaıdy. Sonymen qatar, joba aıasynda mal basy ósip, et jáne sút óndirisi artqan», - dedi senator.
Onyń aıtýynsha, atalǵan joba óziniń tıimdiligin dáleldedi.
«Joba jeke qosalqy sharýashylyqtardy qoldaýǵa negizdelgen. Pılot jobanyń aıasynda qosymsha 40 aýyl okrýgindegi 4 000 jobany júzege asyrý úshin 20 mlrd teńge qarajat qajet bolyp tur. Joǵaryda aıtylǵandardy eskere otyryp, 014 «Aýyl halqynyń tabysyn arttyrý jónindegi jobany masshtabtaýǵa mıkrokredıt berý» bıýdjettik baǵdarlamasy aıasynda atalǵan somany respýblıkalyq bıýdjetten bólýge járdemdesýdi suraımyz», - dedi Ábdáli Nuralıev.
