Senator aýyl sharýashylyǵynda sýbsıdııalaý erejeleriniń jıi ózgerýin synady
NUR-SULTAN. QazAqparat – Aýyl sharýashylyǵynda sýbsıdııalaý erejeleriniń jıi ózgerýi salanyń damýyna keri áserin tıgizýde. Bul týraly QR Parlamenti Senatynyń depýtaty Dúısenǵazy Mýsın málim etti, dep habarlaıdy QazAqparat tilshisi.
«Saraptamalyq baǵalaý boıynsha, basty problema – memlekettik retteýdiń jetilmegendiginde. Ózderińizge málim, táýelsizdik jyldarynda agroónerkásip kesheni men aýyldyq aýmaqtardy damytýǵa baǵyttalǵan toǵyz baǵdarlamalyq qujat qabyldandy. Alaıda, olar saladaǵy jaǵdaıdyń túbegeıli ózgerýine yqpal ete almady. Agrarlyq sektordaǵy ónimderdiń 80 paıyzǵa jýyǵy shıkizat túrinde satylady, birqatar ónimderdiń ımportqa táýeldiligi joǵary. Daıyn taǵamdyq ónimder negizinen shetten ákelinedi, al basty eksporttyq taýarymyz - astyq daqyldary jalpy eksport kóleminiń 42 paıyzyn quraıdy. Memlekettik retteýdiń júıesizdigi, sýbsıdııalaý erejeleriniń jıi ózgerýi salanyń damýyna keri áserin tıgizýde. Osyǵan baılanysty, memlekettik qoldaý sharttaryn ınvestıtsııalyq jobalardyń aıaqtalýyna deıin saqtaý normalaryn zańdy túrde bekitý usynylýda. Bul usynys nazar aýdarýǵa laıyqty dep sanaımyz», - dedi depýtat Senatta agroónerkásiptik keshendi damytý taqyrybyna arnalǵan parlamenttik tyńdaýda.
Sonymen qatar ol salada nesıe qarajattarynyń jetkiliksizdigi men qoljetimdi bolmaýy máselesin atap ótti. Buǵan sebep - aýyl sharýashylyǵy taýar óndirýshileri (AShTÓ) aktıvteriniń, jerdiń kepildik qunynyń tómendigi jáne ótimdi kepilderdiń bolmaýy.
Sýbsıdııalandyrý júıesiniń tıimdiligi máselesi de jetildirýdi qajet etedi. Bul rette AShTÓ-ni barynsha qoldaı otyryp, negizinen sýbsıdııalaýdan arzan jáne uzaq merzimdi kredıtteýge birtindep kóshý máselesin kelesi qabyldanatyn memlekettik baǵdarlamada tereń qarastyrýdyń qajettigi týyndaýda. Bul - eleýli ózgeristerge ákelý múmkindigi Qaýymdastyqtar men Odaqtar ókilderi taraptarynan kezdesýlerde de usynyldy», - dedi senator.
